Doben sira,
tinan ida ne’e Estréia Reitór Mor konvida ita atu reflete oinsá bele sai fermentu iha ita-nia realidade, ita-nia sosiedade, iha mundu ida ne’ebé parese hakribiit valór sira fiar nian. Iha tempu S. Paulo nian, sosiedade mós iha problema barak no sarani sira dala ruma la hatene oinsá moris. Tan ne’e, S. Paulo estabelese relasaun ida entre Jezús, fermentu loos, ne’ebé Moris Hi’as, no sarani sira ne’ebé “sei halo festa la ho fermentu tuan, katak fermentu laran-aat no hakarak aat nian, maibé ho paun ne’ebé fermentu la iha, katak, paun laran-loos no lia-loos nian” (1Kor 5,8).
Ha’u hein katak molok Páskua ida-ne’e, ida-idak hetan tempu ruma atu reflete kona-ba buat ne’ebé “tuan” iha ninia moris, buat lori nia ba aat: tempu Kuarezma mak tempu loos atu nakfilak an no sai ema laran loos no lialoos nian. Tempu Páskua bele sai tempu atu halo buras (fermenta) esperansa, tanba ho Ninia Moris Hi’as Jezús hatudu mai ita katak la iha obstákulu ida, la iha terus ka susar ka mate, ne’ebé Nia la bele manán; tempu atu halo buras damen, iha mundu no sosiedade iha ne’ebé parese katak violénsia mak ukun, Kristu hatán ho perdaun ba sira ne’ebé oho Nia; tempu atu halo buras ksolok, tanba hanesan salezianu matebian ida dehan: “Se ha’u mak otimista, tanba Kristu Moris Hi’as”.
Maibé ita la bele halo buat hirak ne’e mesak, maski konversaun mak uluk knanain pesoál, hodi servisu hamutuk no hodi buka no reflete hamutuk kona-ba ita-nia sosiedade nia presiza, ita bele suporta malu hodi hatudu katak ita mós bele moris hanesan ema ne’ebé “moris hi’as”.
Ha’u-nia Boa Festa ba imi no ba imi nia família sira no komunidade hotu.
Sr. Alma
