Papa Francisco nia lia-menon iha 28 Maiu 2023-Solenidade Pentekostes nian
Maun no biin-alin sira, ‘buongiorno’!
Ohin, Solenidade Pentekostes nian, Evanjellu lori ita ba senákulu, iha-ne’ebé apóstolu sira subar an depoizde Jezús nia mate (Jo 20,19-23). Na’i Moris-Hi’as, iha kalan Páskua nian, aprezenta nia an iha situasaun ta’uk no laran-taridu nian no, hodi huu ba sira, Nia dehan: «Simu Espíritu Santu bá» (v. 22). Nune’e, ho don Espíritu nian, Jezús hakarak liberta dixípulu sira husi ta’uk, ta’uk ne’ebé halo sira taka an iha uma, no liberta sira atu sira bele bá li’ur no sai sasin no haklaken-na’in Evanjellu nian. Ita konsentra uitoan iha buat ne’ebé Espíritu halo: liberta husi ta’uk.
Dixípulu sira taka odamatan sira, Evanjellu hateten, «tanba ta’uk» (v. 19). Jezús nia mate doko sira hotu, sira-nia mehi rahun, sira-nia esperansa lakon. No sira taka an iha laran. La’ós de’it iha sala ne’ebá, maibé iha laran, iha fuan laran. Ha’u hakarak subliña ida-ne’e: taka an iha laran. Dala hira mak ita mós taka an iha an rasik? Dala hira mak, tanba situasaun difisil, tanba problema pesoál ka familiár ruma, tanba terus ne’ebé marka ita eh tanba buat aat ne’ebé iha ita-nia sorsorin, ita iha risku atu namdoras neineik-neineik iha lakon esperansa no falta aten-barani atu bá oin? Dala barak akontese ida-ne’e. Nune’e, hanesan apóstolu sira, ita taka an iha laran, hodi sai dadur iha labirintu sira preokupasaun nian.
Maun no biin-alin sira, buat ida “taka an iha laran” akontese bainhira, iha situasaun difisili liu, ita husik ta’uk domina ita no sai “lian maka’as” iha ita-nia laran. Bainhira ta’uk tama, ita taka an. Ne’e duni kauza mak ta’uk: ta’uk atu labele enfrenta, ta’uk mesak atu enfrenta batalla loroloron nian, atu foti risku no hafoin deziludidu, atu halo hilin sira ne’ebé la loos. Maun no biin-alin sira, ta’uk bloka ita, paraliza ita. No mós izola ita: ita hanoin ba ema seluk ninia ta’uk, ema estranjeiru, ema ne’ebé oinseluk, ema ne’ebé hanoin ho modu seluk. No ita bele mós iha ta’uk ba Maromak: ta’uk nia kastigu ha’u, hirus ha’u… Se ita fó espasu ba ta’uk falsu sira-ne’e, odamatan sira taka hotu: odamatan fuan nian, odamatan sosiedade nian, no mós odamatan Kreda nian! Iha-ne’ebé iha ta’uk, iha takan [fexamentu]. No ida-ne’e la di’ak.
Maibé Evanjellu oferese Na’i Moris-Hi’as nia ai-moruk: Espíritu Santu. Nia liberta ita husi dadur sira ta’uk nian. Bainhira sira simu Espíritu Santu, apóstolu sira – ita festeja ohin – sira sai husi senákulu no sira bá mundu atu perdua salan sira no haklaken liafuan di’ak. Hodi Nia, ta’uk sira lakon no odamatan sira sai nakloke. Espíritu mak halo ida-ne’e: halo ita sente Maromak nia prosimidade no nune’e ninia domin duni dook ta’uk, leno dalan, konsola, sustenta iha adversidade. Hasoru ta’uk no takan nia oin, ita invoka Espíritu Santu mai ita, ba Kreda no ba mundu tomak: atu nune’e Pentekostes foun bele duni sai ta’uk sira ne’ebé asalta ita no halakan filafali ahi domin Maromak nian.
Maria Santíssima, ne’ebé uluk liu atu sai nakonu ho Espíritu Santu, harohan daet mai ita.
