Liturjia Domingu XXVIII Tempu Komún nian deskreve mundu ksolok no domin rohan-laek ne’ebé Maromak hakarak oferese ba nia oan sira.
Iha leitura dahuluk, Isaías fó sai festa” han-hemu” boboot ne’ebé loron ida Maromak, iha nia uma rasik, sei oferese ba Povu hotu. Simu Maromak nia konvite no partisipa iha festa ne’e katak aseita moris iha komuñaun ho Maromak. Husi komuñaun ne’e sei rezulta, ba ema, ksolok totál, moris naresin.
Evanjellu sujere katak presiza “kaer” Maromak nia konvite. Interese no konkista sira mundu ne’e nian labele hadook ita husi Maromak nia dezafiu. Opsaun ne’ebé ita halo iha loron ita-nia batizmu nian la’ós “ko’alia ibun beek de’it”; maibé kompromisu sériu, ne’ebé tenke moris ho modu koerente.
Iha leitura daruak, Paulo aprezenta mai ita ezemplu konkretu ida komunidade ida-nia ne’ebé aseita Na’i nia konvite no moris iha dinámika Reinu nian: komunidade sarani Filipos nian. Komunidade laran luak no solidária, haka’as an atu moris iha domin no fó sasin kona-ba Evanjellu iha ema sira-nia oin. Komunidade Filipos nian, mak loos duni, ezemplu ida ne’ebé komunidade sira Reinu nian tenke banati tuir.
