Loron 21-24 mak enkontru datoluk nian husi ami nia formasaun segundu Novisiadu nian.
Ba loron hirak ne’e ami hetan akompañamentu husi Me. Jacinta Gusmão FMA ne’ebé lori ami atu iha koñesimentu kona ba komunikasaun liu-liu haree ba tópiku sira hanesan: komunikasaun interpesoál, Jezús nu’udar modelu komunikadór perfeitu; komunikasaun karizmátika.
Aspetu umanu komunikasaun nian liuhusi oinsá ita kapta ema seluk nia komunikasaun no saida mak ita komunika. Atu komprende ida-ne’e ami haree “Janela Johari”, ho nia área públika/nakloke, área sekreta, área delek no deskoñesida. Ho janela Johari nian Ida ne’e tulun ami atu koñese di’ak liután se mak ami. Iha komunikasaun ita bele mós hetan barreira ne’ebé impede, katak ita interpreta ema ni akomunikasaun ho ita-ni afiltru pesoál sira, ema nia egoismo, hanoin an, metin ba nia an/ideia, kuran informasaun no laiha adaptasaun ba situasaun tan ne’e presiza toma atensaun.
Ida ne’ebé sai modelu ba komunikasaun mak Jezús Kristu rasik. Komunikasaun ne’ebé Jezús hatudu mak liu husi, Ninia liafuan rasik katak Nia uza linguajen simples atu ema bele komprende (ai-knanoik) liu husi mós “milagre sira”, tan Nia rasik hakarak hatudu Maromak Nia reinu nune’e Jezús komunika maibé mós esije ita ema nia fiar, disponibilidade, nune’e mós komunikasaun presiza halo dialogu no iha konfiansa. Iha Jezús nia tempu mosu mós polémika/konflitu sira ne’ebé Jesus hasoru iha xefi relijiozu sira, maibé ba Jezús ema mak sasukat ne’ebé hatudu valór aas liu, liu fali buat seluk. Iha Jezús nia komunikasaun hatudu loloos Maromak nia domin ba ema,maske dala ruma halo Jezús terus. Kualidade ne’ebé Jezús hatudu mak ” Nia fó atensaun ba relasaun pesoál, iha kontaktu pesoál; “Ninia komunikasaun ne’ebé la halo ema ta’uk maibé iha signifikadu no envolve ema hotu “livre no la obriga ema”. Jezús la interese atu iha massa ka ema barak tuir Nia maibé iha massa boot nia laran nia iha atensaun pesoál, katak ba Jezús ema mak númeru um.
Depoizde Jezús, ami haree mós Don Bosco no Madre Mazzarello nia estilu nu’udar edu-komunikadór/a. Iha sira nia estilu komunika nian sira mak komunikadór ne’ebé ativu liu “liu liu komunika Maromak Nia liafuan ba foin-sa’e sira atu sira bele hatene, no hadomi Maromak”. Iha Valdocco no Mornese Don Bosco no Madre Mazzarello iha objetivu ne’ebé klaru tan ne’e kria ekosistema Ida ne’ebé fó moris, katak Uma ne’ebé nakloke no aprende ba futuru, nune’e mós uma ne’ebé iha ksolok, iha dame, iha diálogu resíproku. Don Bosco no Madre Mazzarello mós kria relasaun ho “ammorevollezza” iha ambiente Salezianu ne’ebé lori sira atu iha enkontru ho Maromak. Depois de Don Bosco no Madre Mazzarello nia ekosistema iha Valdocco no Mornese nian, madre mós aprezenta mai ami kona-ba ita nia prezensa iha rede sosiál tuir ita-nia dokumentu “liña gia kona ba FMA nia prezensa iha rede sosiál”; orientasaun sira-ne’e tulun ami atu moris didi’ak ami nia vokasaaun no misaun basá rede sosiál mós espasu misaun nian: “prezensa iha rede sosiál mak misaun ida ne’ebé ita tenke sai prezensa ne’ebé ativa ho objetivu atu atu eduka, komunika no evanjeliza”. Ita tenke iha korresponsabilidade no ho laran manas ita tenke sai disponivel, no mós sai ekosistema Ida ne’ebé nakloke no transparente.
Loron ikus enkontru nian ami haree fila fali kona-ba liturjia. Saida mak halo parte liturjia, elementu sira liturjia nian, tinan litúrjiku, no kalendáriu litúrjiku. Kona-ba materiál sira, Ir Jacinta dehan katak buat barak tau iha Tatoli husi 2017-2018. Bele hetan materiál kona-ba animasaun litúrjika iha Eukaristia no liturjia Oras nian. Liturjia mak hun no tutun ita-nia moris sarani nian no konsagrada nian, tan ne’e presiza tau atensaun boot. Hodi hatene porezemplu tipu salmu sira iha saltériu, ita bele anima komunidade reza didi’ak.
Obrigada barak ba madre Tita ne’ebé ho domin boot akompaña ona ami iha enkontru datoluk nian ida ne’e. Obrigada barak ba sakrifisiu no dedikasaun tomak. Ami haka’as an atu pratika iha ami nia moris formasaun ne’ebé ami simu ona.
(Domingas – Fatima FMA)
