22 Setembru

Beatu José Calasanz Marqués

Mártir persegisaun española

 

Entre 1936 no 1939, España nakdoko ho funu sivíl dramátika no fakar raan nian: konflitu ida nakonu ho antagonizmu ideolójikuk nakfilak ba konfrontu entre demokrasia no faxizmu, entre republikanu no rebelde sira ho nia ulun jenerál Franco. Kreda española mós selu konta ho terus persegisuan maka’as, liuliu husi forsa anarkíka no milisiana sira. Sira hala masakre rihun ba rihun ba amlulik sira, relijiozu sira, relijioza sira no leigu/a sira, tan de’it sira ema sarani. Entre sira ne’e, iha mós númeru boot membru sira Família Saleziana nian: amlulik 39, klérigu/frater 22, koadjutór/Irmaun 24, Filhas de Maria Auxiliadora na’in rua, Salezianu Kooperadór haat, aspirante Salezianu na’in tolu no kolaboradór leigu ida, totál na’in 95.

Beatu José Calasanz Marqués moris iha España, iha 23 Novembru 1872. Nia koñese S. João Bosco bainhira vizita Barcelona iha 1886, hafoin nia tama iha Uma Saleziana Sarriá nian. Nia tama iha komunidade Saleziana bainhira nia tinan 18, iha 1890 no simu ordenasaun saserdotál depoizde tinan lima, no nia mak salezianu españól dahuluk atu simu sakramentu Orden.

Padre José Clasanz Márques sai sekretáriu ba Beatu Filippo Rinaldi nian durante tinan sanulu no, tuirmai, superiór Inspetoria Peru-Bolívia. Fila fali ba España, nia sai membru Inspetoria Tarraconense (Barcelona-Valéncia) no iha 1925 nomeia nia nu’udar provinsiál to’o loron nia mate. Ho laran-di’ak no delikadeza iha hahalok nia lori Inspetoria nia destinu ho firmeza no espíritu paternu, nune’e barak konsidera nia nu’udar “Don Bosco seluk”.

Mane fuan nian no serbisu-na’in boot ida, husi inísiu kedas nia preokupa ba nia maun-alin sira nia salvasaun, ninia Superiór sira no Kongregasaun tomak, hodi hatudu atividade kolen-laek iha ninia servisu.

Nia prega hela ezersísiu espirituál ba Irmaun sira Valéncia nian, bainhira iha kalan husi 20 ba 21 Jullu 1936, milisianu kaer nia hamutuk ho komunidade tomak. Enkuantu persegisaun aumenta ba beibeik, nia espresa ba ninia maluk Irmaun ida ninia laran-taridu: “Ha’u-nia oan, ita tenke iha konfiansa boot liután ba Divina Providénsia. Maski nune’e, ha’u fiar katak ha’u iha Maromak nia grasa”.

Liutiha semana ida sira hotu hetan liberdade no depoizde Padre José fó buat ne’ebé presiza ba ida-idak, nia haruka sira buka fatin seguru atu hela no saran an ba Providénsia.

Iha 29 Jullu 1936, milisianu sira kaer fali de’it José Calasanz no lori ba Komité revolusionáriu, ho tan Irmaun na’in rua. Milisianu sira Mislata nian, haree tiha batina iha ninia mala-oan, husu se nia padre. Ho kalma no dignidade, nia hatán: “Sim, ha’u Saserdote Salezianu”. Ho ne’e sira deside oho nia. Sira lori nia iha kamioneta ida ba Valénsia no, bainhira to’o iha Ponte de São José, sira tiru mate nia iha ulun durante viajen, iha loron  ne’e kedas: 29 Jullu 1936.

Papa S. João Paulo II beatifika nia iha 11 Marsu 2001, hamutuk ho mártir españól na’in 232 iha Valéncia.