Editoriál:
Halakan nafatin ahi domin nian
Ita iha tinan pastorál nia klaran no tempu atu halo avaliasaun ba moris pesoál no komunitária. Tempu atu haree oinsá ita hala’o ita-nia programa sira tinan ne’e nian, nune’e bele hafoun an fali.
Konstituisaun indika katak momentu espesiál renovasaun interiór nian ida mak “ezersísiu espirituál tinan-tinan, ne’ebé Don Bosco konsidera iha importánsia boot atu iha kbiit foun iha dalan santidade nian” (Konst. 46). Madre Mazzarello hanorin, tempu ne’e mak «tempu loos atu halakan filafali ahi» (Surat 27) no hodi halo didi’ak santu ezersísiu sira, Don Bosco hateten «Na’i nia grasa sira sei tun naresin hanesan udan iha ita, nune’e, ita hotu sei la’o ba oin, iha dalan santidade nian» (MB XIII, 126).
Durante Retiru, Inspetora fó hanoin fali kona-ba “hilin prioritáriu sira” Kapítulu Jerál XXIV, ne’ebé sai mós programa inspetoria nian: “formasaun kontínua, sinodalidade misionária, raronak ba kiak sira no rai nia hakilar iha ekolojia integrál nia perspetiva”. Formasaun kontínua, mak kondisaun atu hafoun ita-nia entuziazmu vokasionál. Ba ne’e ita keta husik responsabilidade forma an ne’e, autoformasaun hamutuk atu la hamate ahi domin ba Maromak no foin-sa’e sira.
Ho entuziazmu foun husi ezersísiu espirituál, ita kontinua ita-nia misaun to’o remata tinan pastorál 2023, no ho entuziazmu hanesan, ita pronta atu dehan “vado io” iha misaun ne’ebé Na’i sei haruka ita atu bá iha tinan tuirmai.
(JG)
