Baucau 24 Outobro 2023,

Peregrinasaun Catedral Santo António Baucau

Formanda hotu FMA nian husi Pre-Aspirante, Aspirante, Postulante no Novisa sira hamutuk ho Madre Formadora sira ne’ebe akompaña iha formasaun sira kada etapa ida-idak dedika loron ne’e nu’udar jornada orasaun nian. Agradese ba Maromak nia laran di’ak ne’ebé akompaña iha formasaun sira hotu atu formande ida-idak deskobre liu tan Maromak nia hakarak, no fiel liutan ba  Nia bolun.

Loron ne’e mos ita komemora memoria Maria Auxiliadora nian. Hili loron ida ne’e ba  jornada orasaun nian hodi husu Inan Virjen tulun nain, Nia ne’ebé nu’udar Inan, Mestra no guia Institutu nian atu kontinua la’o hamutuk iha momentu hotu no agradese ba Nia tulun no akompañamentu liu husi Madre formadora sira.

Ho tempu hanesan agradese ba Madre sira ekipa formasaun nian ne’ebé ho laran di’ak no laran luak hodi  akompaña  formande ida-idak atu sai futuru FMA ne’ebé di’ak no autentika. Iha momentu ne’e mos iha orasaun penitensial nian, konfesaun no selebrasaun Eukaristia, ne’ebé preside husi Padre Agnelo,SDB. Iha selebrasaun Eukaristia iha Padre nia omilia dehan: husi primeira leitura fo hanoin kona-ba labele lakon esperansa no grasa ne’ebé boot liu mak ita nia komuñaun ho Maromak,husi Evanjellu dehan kesi futu kabun katak tahan buat hotu atu keta monu no halakan ahi oan katak prontu nafatin no sai domin Maromak nian ba ema seluk. Ho liafuan murak ne’e sai nu’udar enkorajamentu mai ami formande ida-idak katak Maromak fo importansia ba bolun ida ne’e sai aten-brani no fiel ba ami nia vokasaun, dezafiu nafatin iha miabé ho fiar katak dezafiu mosu iha komunidade no ho komunidade mak ita nia forsa.

Selebrasaun remata hodi vizita gruta Santo António, iha ne’ebé ami fahe ksolok fraternidade nian, liu husi jogus sira, han hamutuk no komprimenta malu nu’udar sentidu gratidaun nian.

Hodi remata peregrinasaun ne’e, ami simu bensaun Maria Auxiliadora nian ne’ebé halo kada fulan ho devosaun boot.

Novisa FMA, 2023