Domingas da Silva FMA
Cassa, 09 de Novembro 2023
Lalaok vizita kanonika iha komunidade Madre Roseta Marchese-Cassa
Vizita Kanonika irman Ispetora nian ba komunidade sira mak atu hakbiit liutan irman idak-idak nia fidelidade ba Karisma liu husi knaar ne’ebé komunidade halao. Tamba ne’e loron haat ir. Alma nia vizita iha komunidade nia fo tempu hodi hasoru no rona labarik sira, foinsa’e sira no familia sira ne’ebé nu’udar destinatariu ba komunidade nia misaun iha fatin refere.
Oratorianu sira
Iha ir. Alma nia enkontru ho oratorianu sira nia husu sira atu kontinua sai fermentu ho sira nia atitude diak sira atu tulun familia sira, koleka sira no ema ne’ebé sira hasoru iha sira nia moris. Ir. Alma husu sira atu la bele tau sira nia liman iha bolsu signifika uza didiak sira nia liman atu halo buat ne’ebé diak no los; hanesan liman atu halo servisu fo tulun ba ema seluk no mos tulun an rasik.
Nukleo komunidade Edukativa
Hamutuk ho komunidade edukativa ir. Alma fo tempu hodi rona inan sira ne’ebé servisu hamutuk ho irman sira iha misaun edukativa liu husi aktividade sira ne’ebé trasa hamutuk iha planu projetu komunidade nian. Ir. Alma dehan : hau agradese ba imi ida-idak nia prezensa no kolaborasaun hamutuk ho irman sira iha misaun Kristu nian iha fatin ida ne’e, hau husu atu imi kontinua nafatin buat ne’ebé imi halo ona atu Kristu nia domin bele to’o ba ema hotu.
Komunidade FMA
Hanesan Ispetora, ir. Alma nia prezensa mak prezensa inan nian atu haree oinsa irman sira nia moris orasaun, misaun no fraternidade iha komunidade nia laran. Nia fo tempu rona no akompaña irman ida-idak liu husi kolokiu hodi suporta liutan ida-idak nia vokasaun no misaun atu fo sasin ba Kristu no serbi Kristu iha misaun lor-loron nian.
Nu’udar komunidade ami agradese tebes ba ir. Alma nia prezensa hamutuk ho ami iha komunidade hodi fahe ksolok hamutuk liu-liu ho vizita ida ne’e halo ami deskobre liutan fafurak vokasaun salesiana nian.
Obrigada wa’in ir. Alma Castagna!
