Liturjia Domingu XXIX Tempu Komún nian konvida ita atu reflete kona-ba forma oinsá ita tenke tetu relasaun entre realidade sira Maromak nian no realidade sira mundu nian. Nia hateten katak Maromak mak ita-nia prioridade no katak ba Nia mak ita tenke subordina ita-nia ezisténsia tomak; maibé nia aviza mós ita katak Maromak bolu ita ba kompromisu efetivu ida ho mundu nia konstrusaun.
Evanjellu hanorin katak ema, hodi la husik atu kumpre ninia obrigasaun sira ho komunidade nia integra an bá, ba Maromak de’it mak nia pertense no tenke entrega ninia ezisténsia iha Maromak nia liman. Buat seluk hotu tenke relativiza, inklui submisaun ba podér polítiku.
Leitura dahuluk dehan mai ita katak Maromak mak istória nia Na’in loos nian no Nia mak gia Povu iha nia dalan ba ksolok no realizasaun nakonu. Ema sira ne’ebé atua no intervein iha istória mak instrumentu de’it ne’ebé Maromak uza atu konkretiza Ninia projetu sira salvasaun nian.
Leitura daruak aprezenta mai ita ezemplu komunidade sarani ida ne’ebé tau Maromak iha sentru nia dalan nian, no maski hasoru difikuldade sira, nia kompromete an ho barani ho valór sira no eskema sira Maromak nian. Maromak mak hili nia atu sai sasin iha mundu, moris fiar ativa, ho karidade badinas no iha esperansa ne’ebé la nakdoko.
