Liturjia Domingu Komún XXX dehan mai ita, ho modu klaru katak domin mak sentru esperiénsia sarani nian. Buat ne’ebé Maromak ezije husi sarani ida-idak mak husik domin hakonu nia fuan.
Evanjellu dehan momoos mai ita, katak Maromak nia revelesaun tomak habadak iha domin – domin ba Maromak no domin ba maluk sira. Ukun-fuan rua ne’e labele haketak malu: “hadomi Maromak” katak kumpre Ninia vontade no estabelese ho maluk sira relasaun domin nian, solidariedade nian, partilla nian, servisu nian, to’o don totál moris nian. Buat seluk mak esplikasaun, dezenvolvimentu, aplikasaun iha vida prátika koordenada fundamentál sira moris sarani nian ne’e.
Leitura dahuluk garante ita katak Maromak la aseita situasaun permanente injustisa nian, arbitrariedade nian, opresaun nian, respeitu-laek ba direitu no dignidade ema sira ne’ebé kiak liu no fraku liu. N.e. leitura ko’alia kona-ba situasaun ema estranjeiru sira-nian, oan-kiak sira-nian, feto-faluk no kiak sira vítima espekulasaun husi ema sira ne’ebé empresta: krime naran de’it hasoru ema kiak no fraku liu mak krime grave kontra Maromak, ne’ebé hadook ita husi komuñaun ho Maromak no hasai ita husi Aliansa.
Leitura daruak aprezenta mai ita ezemplu komunidade sarani ida (Tessalónica) ne’ebé, maski moris iha persegisaun, aprende atu la’o ho Kristu no ho Paulo, iha dalan domin no don moris nian; liuhusi ksolok no terus, nia sai fini fiar no domin nian, ne’ebé fó fuan iha komunidade sarani seluk iha mundu gregu. Husi esperiénsia komún ne’e, moris família boot ida maun no biin-alin sira-nian, halibur hale’u Evanjellu no namkari iha mundu gregu tomak.
