Liturjia domingu ne’e nian konvida ita atu foti konxiénsia kona-ba oinsá ezijente dalan “Reinu” nian. Hili “Reinu” la’ós dalan ida fasilidade nian, maibé aseita la’o tuir dalan hakribi-an no saran moris nian.
Evanjellu mak hatudu katak dalan Reinu nian tenke iha fatin dahuluk liu fali ema sira ne’ebé ita hadomi, ita-nia rikusoin sira, ita-nia interese sira no eskema pesoál. Se karik simu proposta ne’e, ita tenke hanoin sériu se simu ga lae, se iha kbiit atu simu… Jezús la admite fó sorin-sorin: se aseita “Reinu” tenke lori to’o rohan no tempu tomak, se lae lalika hahú buat ruma ne’ebé ikusmai la lori to’o rohan.
Leitura dahuluk fó hanoin ba ema hotu ne’ebé la konsege deside ba “Reinu” katak iha Maromak de’it mak bele hetan ksolok loos no sentidu moris nian. Nune’e, enkorajamentu implísitu mak adere ba “Reinu”: maski ezijente, ne’e mak dalan ne’ebé lori ba ksolok nakonu.
Leitura daruak fó hanoin katak domin mak valór fundamentál, ba sira hotu ne’ebé aseita dinámika “Reinu” nian; nia de’it mak halo deskobre igualdade ema hotu nian, tanba ema hotu nia Aman ida de’it no sai maun-alin iha Kristu. Aseita moris tuir lójika Reinu nian signifika rekoñese iha ema ida-idak maluk ida no moris konsekuénsia sai maun-alin ba malu.
