Liturjia domingu ne’e nian hatudu mai ita, nu’udar ezemplu konkretu, oinsá Maromak iha projetu ida salvasaun nian atu oferese ba ema hotu, lahó esesaun; rekoñese Maromak nia don, simu nia ho gratidaun, mak kondisaun atu manán alienasaun, terus, buat ne’ebé hadook ita husi Maromak no maluk sira no to’o ba moris nakonu.
Primeira leitura aprezenta mai ita istória ema moras-lepra ida (Naamán). Epizódiu ne’e revela katak Jahwéh oferese ba ema vida no salvasaun, lahó limite no esesaun; ema presiza de’it hakohak Maromak nia don, rekoñese Nia nu’udar Makso’ik mesak no hatudu gratidaun ba Nia.
Evanjellu aprezenta grupu ida ema moras-lepra nian ne’ebé hasoru Jezús no liuhusi Jezús sira deskobre Maromak nia laran-sadia no domin. Sira reprezenta umanidade tomak ne’ebé moris iha mizéria no terus, no Maromak haraik ba sira nia laran-di’ak, domin, salvasaun. Iha-ne’e mós bolu atensaun ba ema nia resposta ba Maromak nia don; ema hotu ne’ebé koko salvasaun ne’ebé Maromak oferese tenke rekoñese don ne’e, simu nia no manifesta ninia gratidaun ba Maromak.
Leitura daruak define ezisténsia sarani nu’udar identifikasaun ho Kristu, Ema ne’ebé hakohak Maromak nia don sai eskolante: identifika an ho Kristu, moris iha domin no iha entrega ba maun-alin sira no to’o ba moris foun resureisaun nian.
