Liturjia domingu ne’e nian hanorin ita katak Maromak nia laran monu lalais ba ema “fraku” ema haraik-an no ema kiak sira, ema marjinalizadu sira; no sira-ne’e mak iha sira-nia despojamentu/hamamuk-an, iha sira-nia haraik-an, sira-nia frajilidade (no sira-nia salan mós), besik liu salvasaun, basá sira mak disponivel liu atu simu Maromak nia don.
Leitura dahuluk define Maromak nu’udar “juiz justu” ida, ne’ebé la husik atu ema kbiit-na’in sira suborna nia ho sira nia oferta boboot, sira ne’ebé pratika injustisa iha komunidade sira; Maromak hadomi ema haraik an no rona sira nia hakilar.
Evanjellu define atitude loos ne’ebé fiar-na’in tenke asume iha Maromak nia oin. Nia rekuza ema loko-an no autosufisiente sira nia atitude, ne’ebé konvensidu katak salvasaun mak rezultadu naturál husi sira-nia méritu sira; no propoin atitude haraik-an ema maksalak nian, ne’ebé aprezenta an iha Maromak nia oin ho liman mamuk, maibé dispostu atu simu Maromak nia don. Atitude “ema kiak” nian ne’ebé Lucas propoin ba fiar-na’in sira ninia tempu nian no tempu hotu nian.
Iha leitura daruak, ita iha konvite ida atu moris dalan sarani ho entuziazmu, ho entrega, ho ánimu – tuir Paulo nia ezemplu. Leitura halai uitoan husi tema jerál domingu ne’e nian; maski nune’e, ita bele dehan katak Paulo mak ezemplu di’ak ida atitude ne’ebé Evanjellu ohin propoin: nia konfia, la’ós iha ninia méritu sira, maibé iha Maromak nia laran-sadia, ne’ebé justifika no so’i ema hotu ne’ebé simu nia.
