Liturjia domingu ne’e nian propoin mai ita reflesaun ida kona-ba ema nia moris nia rohan no garante katak moris ne’e la remata.
Iha primeira leitura, ita iha maun-alin na’in hitu nia sasin ne’ebé fó moris ba fiar, durante persegisaun Antíoco IV Epifanes hasoru ema judeu sira. Buat ne’ebé motiva, fó kbiit ba maun-alin na’in hotu ne’e atu enfrenta tortura no mate mak, presizamente, serteza katak Maromak rezerva moris rohan-laek ba sira ne’ebé, iha mundu ne’e la’o ho fidelidade iha Ninia dalan sira.
Iha Evanjellu, Jezús garante katak resurreisaun mak realidade ne’ebé hein ita. Ita-nia ezisténsia moris-hi’as nian mak ezisténsia ida nakonu, totál, foun. Forma oinsá buat ne’e sei akontese mak mistériu ida; maibé resurreisaun mak serteza absoluta iha ema fiar-na’in ninia orizonte.
Iha segunda leitura ita simu konvite ida atu mantein diálogu no komuñaun ho Maromak, enkuantu hein Kristu ne’ebé sei mai ba dala rua no moris foun ne’ebé Maromak rezerva mai ita. Ho orasaun de’it mak ita bele mantein fiél ba Evanjellu no soi korajen atu haklaken ba ema hotu Liafoun Di’ak salvasaun nian.
