Liturjia domingu ne’e nian reflete kona-ba sentidu istória salvasaun nian no hateten mai ita katak meta finál ne’ebé Maromak lori ita bá mak lalehan no rai foun ksolok nakonu nian, vida definitiva nian. Kuadru ne’e hamoris iha ita esperansa; no husi esperansa mosu aten-barani au enfrenta adversidade no atu luta ba Reinu nia adventu.
Iha leitura dahuluk, “Maromak nia manu-ain” ida hato’o ba komunidade ida ne’ebé dezanimada no moris iha apatia katak Jahwéh la abandona ninia Povu. Maromak libertadór sei intervein iha mundu, halakon ida ne’ebé hanehan no na’ok moris no halo atu “loro-matan justisa nian” moris no lori salvasaun.
Evanjellu oferese mai ita reflesaun ida kona-ba dalan ne’ebé Kreda simu bolun atu la’o tuir, to’o Jezús nia fila hikas ba dala rua. Eskolante sira ne’ebé la’o iha dalan istória nian, iha empeñu ba mundu nia transformasaun, atu realidade tuan lakon no Reinu bele moris mai. “Dalan” ne’e sei hala’o iha difikuldade no persegisaun sira nia leet; maibé eskolante sira sei hetan nafatin Maromak nia tulun no kbiit.
Leitura daruak reforsa ideia katak, enkuantu ita hein vida definitiva, ita laiha direitu atu hela iha hahalok baruk nia laran no iha komodizmu, hodi sai indiferente ba kestaun sira mundu nian no evita fó ita-nia kontributu ba Reinu nia konstrusaun.
