Maromak nia Liafuan, iha domingu ikus tinan litúrjiku nian, konvida ita atu foti konxiénsia kona-ba Jezús nu’udar liurai. Nia ukun/realeza la’ós hanesan mundu nian, maibé hala’o iha domin, iha servisu, iha perdaun, iha saran moris.
Leitura dahuluk aprezenta mai ita momentu ne’ebé David sai liurai Israel tomak nian. Ho nia, hahú tempu ksolok nian, abundánsia nian, dame nian, ne’ebé hela iha Maromak nia Povu tomak nia memória. Iha sékulu sira tuirmai, Maromak nia Povu mehi atu ksolok no David nia ukun fila fali; profeta sira promete katak David nia dexendente/bei-oan ida mak sei realiza mehi ne’e.
Evanjellu aprezenta mai ita realizasaun promesa ne’e nian: Jezús mak Mesias/Liurai ne’ebé Maromak haruka, ne’ebé halo sai realidade mehi antigu Maromak nia Povu nian no aprezenta ba ema sira “Reinu”; maski nune’e, “Reinu” ne’ebé Jezús propoin la’ós Reinu ida harii iha forsa, violénsia, impozisaun nia leten, maibé kona-ba domin, perdaun, saran moris.
Leitura daruak aprezenta knananuk ida Kristu nia ukun no kbiit nian iha kriasaun tomak; aleinde ne’e, nia tau iha relevu ninia papél fundamentál nu’udar bee-matan moris nian ba ema.
