Liturjia Domingu XX Tempu Komún nian reflete kona-ba universalidade salvasaun nian. Maromak hadomi nia oan ida-idak no ba sira hotu Nia konvida ba han-hemu Reinu nian.
Iha leitura dahuluk, Jahwéh garante ba nia Povu tempu foun ne’ebé atu mai, iha ne’ebé sei revela Maromak nia salvasaun. Maibé, salvasaun ne’e la’ós de’it ba Israel: nia ba mane no feto hotu ne’ebé aseita konvite atu integra an iha komunidade Maromak nia Povu nian.
Evanjellu aprezenta realizasaun profesia Trito-Isaías nian, ne’ebé ita haree iha leitura dahuluk domingu ne’e nian. Jezús, haree tiha katak farizeu no doutór sira Lei nian lakohi Ninia proposta Reinu nian, nia tama iha rejiaun jentiu sira nian no hatudu oinsá ema jentiu sira merese simu Maromak nia don. Ba feto kananeia ida ne’ebé fiar, Jezús oferese salvasaun ne’ebé Maromak promete atu fó ba ema hotu lahó distinsaun.
Leitura daruak sujere katak Maromak nia laran-sadia suli ba nia oan sira hotu, suli mós ba sira ne’ebé, hanesan Israel, rejeita Ninia proposta sira. Maromak respeita nafatin ema nia opsaun sira; maibé la deziste atu propoin, iha momentu hotu no ba nia oan sira hotu, oportunidade foun atu simu salvasaun ne’ebé Nia hakarak oferese.
