Dili – Comoro, 15 de Abril 2018, ambitu pastoral Juvenil halao enkontru ba animadores sira zona Dili no Maliana, maibe iha biban ne’e animadores sira husi Zona Maliana la marka prenzensa, tanba distansia dook demais. Nune’e animadores sira ne’ebé partisipa iha enkontru ne’e mak mai husi Oratorio sentru hotu ne’ebé hola parte ba zona Dili nian, animadores hirak ne’ebé marka prezensa kuaze 90 pessoa inklui mos frater ,formande no irman sira husi komunidade ida-idak zona Dili nian.
Fasilitadora formasaun ida ne’e mak Ir. Armenia Menezes, FMA. Molok hahu formasaun, uluknanain hahu ho missa ne’ebé halao iha Sentru Post Novisiado SDB Comoro, missa ne’e preside husi Padre Silvano,SDB ne’ebé nu’udar prezidente pastoral Juvenil Zona Dili nian.
Depois missa remata, kontinu kedas ho formasaun, tema ba formasaun mak koalia kona ba estreia reitor Mor nian ,” Na’i fo mai ha’u bee ida 
ne’e ” Enkontru Jesus ho feto Samaritana, enkontru ida ne’e mak enkontru rona nian enkontru ne’ebé lahusik indiferente, enkontru ne’ebé dudu no fo korajem atu la’o ba oin hodi halo disernimentu, halo diserne ba nia-an ne’ebé lori atitude rekoñese hodi komprende ho pasiensia no domin, tuir buat ne’ebé Espiritu sujere no enkontru ida ne’e lori ema atu hili ho liberdade buat ne’ebé diak ba nia moris. Jesus akompaña feto Samaritana hodi halo transformasaun ba nia moris, nune’e mos ba animadores ida-idak ita akompaña ita nia foinsa’e no labarik sira iha asaun pastoral, la to’o deit halimar no la’o ho sira maibe ita nia finalidade mak atu lori sira ba Jesus. Nune’e molok atu akompaña ita nia labarik no foinsa’e sira, uluknanain ita mos presiza sai hanesan feto Samaritana, ne’ebé hamrook buka Jesus, buka atu hemu bee ne’ebé Jesus fo, tanba bee ne’ebé Jesus fo mak bee moris rohan laek nian, ita presiza hemu bee ida ne’e liu husi sakramentu sira no Maromak nia futar lia. Nune’e ita nia akompañamentu ba ita nia oratoriano sira bele too finalidade ne’ebé diak, ne’eb’e fo ksolok ba Maromak no ba ita.
Wainhira madre aprezenta tiha Estreia Reitor Mor nian no filmajem badak, iha mos kondivisaun ba grupo tuir perguntas ne’ebé fo, mak hanesan:
- Bainhira imi hasoru problema ruma eh situasaun pessoal ruma kona ba namora, eskola, konflitu oinsa imi resolve!
Tuir esperiensia animadores sira nian:
( Afonso Monteiro/ Animadores. Balide )“ buka atu tahan ha’u nia emosaun, halai buka Jesus hodi halo orasaun pessoal nune’e iha orasaun bele fakar sai problemas hotu ne’ebé halo ha’u stress, entaun ha’u bele sente kmaan maske dalaruma problema seidauk resolve. Dalan seluk mak ha’u buka madre ka irman ruma atu fahe ha’u nia problema, presiza mos ha’u nia loke-an ba ema sira ne’ebé nia ha’u fiar katak bele tulun ha’u, hafoin ha’u bele sente livre no kmaan, ida ne’e lori ha’u atu hetan solusaun ba ha’u nia problema”.
(grupo balun) hatan perguntas seluk ne’ebé dehan :
- Iha imi nia dalan moris imi hetan ema pronto atu rona, simu no akompaña imi? Se lae karik imi sei halo saida!
Sira nia sintezi grupo nian dehan nune’e: “ Joven sira mai ho situasaun ne’ebé lahanesan, balun hela ho inan-Aman, balun lae, entaun ida ne’ebé prontu atu rona mak inan-aman, inan aman suporta kualker situasaun, se la’e mak ami presiza pasiensia, brani atu simu hodi fiar iha Maromak nia kbiit no grasa.
No resposta ikus ba foinsa’e sira ne’e mak buat ne’ebé konkretamente sira hein ka husi aman inan, kreda, madre, Padre Edukador no edukadora sira mak ;“ Suporta ami ho Orasaun no edukasaun to’o iha finalidade ”.
Esperiensia kondivisaun grupo nian mak ita rona no lee tiha ona, iha grupo barak maibe ami sita balun deit, hafoin kondivisaun remata madre halo rezumo no fahe malu ho almoço hamutuk.
(Maria Sarmento Guterres)
