Dili – Iha loron 17 Janeiru, iha Noviciado, Novicia II ano sira ne’ebe estuda dadaun Konstituisaun kona ba Votus sira, halo sira nia aprezenta laboratorio kiik ida kona ba Dom Bosco nia mehi Diamante 10 (Sanulu) nian, ne’ebe iha relasaun ho Votu Kastidade no Pobreza. Ho entuziasmo no ksolok bo’ot sira prepara didiak material sira, ambiente no halo aprezentasaun ne’ebe furak no atrae tebes. Sira ida-idak aprezenta diamante sira tuir knar ne’ebe sira fahe ona, hanesan;
Nov Teresa hato’o introdusaun no Diamante tolu Virtude Teologais nian.
Iha 10-9-1881, loron ne’ebe Igreja konsagra ba Glorioso nome da Maria, saleziano sira halibur hamutuk iha Igreja São Benigno Canavese, atu halo exercicio spiritual. Iha ne’eba mak kalan Dom Bosco mehi kona ba Diamante Sanulu. Mehi ne’e mak mak hanesan tuir mai ne’e:
DB toba dadaun nia hare nia an iha kuartu bo’ot ida ne’ebe infeita kapas liu, nia lao hamutuk ho director sira komunidade nian. Iha momentu ne’eba mane ida ho oin furak mosu iha sira nia oin, Nia hateke ba sira hodi la koalia no hahu lao besik sira, husi ne’eba sira hare Diamante 10 ne’ebe bo’ot no nabilan maka’as no fo susar atu hateke ba mane furak ida ne’e nia oin. Diamante lima iha mane ne’e nia oin no lima iha mane ne’e nia kotuk. Diamante ida-idak iha nia signifikadu iha ita nia moris spiritual, fraternal, misaun no votus sira.
Fiar: Hakuak estudu fiar nian atu imi bele hafunu hasoru demoniu no babeur. Tanba ne’e fiar ne’ebe la ho hahalok diak, mak fiar ne’ebe la moris ona. Laos ida ne’ebe rona deit maibe ida ne’ebe tau iha pratika sei hetan Maromak nia reinu.
Esperansa: Imi tau laran metin iha Na’I, laos iha ema sira, imi nia fuan okupa nafatin ho hakas-an atu hetan ksolok lo’os.
karidade:Lori maluk sira nia todan, se imi hakarak moris tuir Hau nia ukun fuan karik, hadomi no sai domin nain. Maibe imi hadomi imi nia klamar no ema seluk nia klamar hodi reza didiak, selebra Santa Missa ho atensaun no vizita Jesusu iha sakramentu ho domin.
Nov. Sidonia hato’o kona ba Diamante rua Sevisu no Temperansa
Serbisu: Serbisu mak ai-moruk hasoru foer, no kilat ida hasoru diabu nia babeur.
Temperansa: Intemperansa no kastidae labele hela hamutuk. Ahi sei mate bainhira ita hasai ai sanak. Halo moruk ida ho hateken, ho nia gostu han nian, no ho hakarak atu deskansa, atu inimigu sira la halakon imi nia klamar, falta temperansa karik, kastidade mos la iha.
Nov. Domingas hato’o kona ba Diamante tolu Votus nian
Obidiensia: Nia mak fatuk inan no koroa iha konstrusaun Santidade nian.
Pobreza: Reinu lalehan mak ema kiak sira nian, rikusoin hanesan ai tarak sira, pobreza la bele halao liu husi lia-fuan sira deit, maibe liu husi domin no hahalok mak loke odamatan lalehan nian.
Kastidade: Virtude sira lao hamutuk ho nia, ema sira nia fuan mos sei hare Maromak nia misteiru sira hodi kontenmpla Maromak duni.
Nov. Ingracia hato’o kona ba Diamante rua Jejum no premio
Jejun: Nia mak hanesan kilat hasoru demoniu nia bosok, nia mak mahein virtude nian, ho jejun ita bele manan baluk sira Lalehan nian. DB dehan mortifikasaun mak simu buat hotu ne’ebe inkomoda no kontra tempu. Se mak la mortifika nia isin laiha kapasidade atu reza diak.
Premiu: Imi gosta premiu sira karik, keta tauk hasoru difikuldades sira, terus hamutuk ho hau, tempu terus nian iha rai sei liu deit, maibe ba hau nia belun sira tempu ksolok nian iha lalehan mak sei ba nafatin.
Ikus sira agradese wain ba Madre Maestra ne’ebe husu sira prepara laboratorio ne’e no fo oportunidade atu aprezenta ba komunidade no novisia I ano sira. Tamba sira sente katak ho laboratorio ne’e hariku liu tan sira nia koñesementu, tulun sira deskobre tan furak sira iha Instituto nian, no habo’ot liu tan sira nia hakarak atu lao ba oin.
(Noemia de Deus)
