Enkontru ho Novisa sira
Dili – Iha 7 Agosto, tuku 9 dader iha komunidade S.Jose novisadu Comoro, Madre Maria Nieves Reboso nu’udar konsilleira jeral ba ambitu formasaun nian hasoru malu ho novisa primeiru anu sira, enkontru ne’e hahu ho orasaun badak ho salmo 137 hodi agradese ba Maromak.
Iha enkontru ne’e hahu ho perguntas sira ne’ebé Madre fó mai ami atu reflete kona ba valor saida de’it mak ami simu husi familia, valor saida mak aprende husi komunidade, artigu konstitutu nian ne’ebé kona liu ami, oinsá ami husik ami nia an atu ema akompaña ami. Madre Nieves husu atu novisa ida-idak haklean etapa novisadu tuir projetu formativu FMA nian sai nu’udar esperensia fundamental sira iha aspetu importante sira hanesan: Sequela Christi, vida komunidade, asimilasaun karisma no konfrontasaun ho Maestra. Madre Nieves mós dehan katak etapa novisadu mak momentu ne’ebé importante liu atu hari relasaun metin ho Jezús no hateke nafatin ba Nia nu’udar sentru iha ami nia moris.
Iha sesaun II Madre Nieves subliña atitude dosilidade ne’ebé importante liu ba ita atu assume, husi aspirante to’o Madre ferik sira. Iha formasaun prezisa atitude dosilidade, hodi husik buat hotu ne’ebé ita hasoru forma ita.
Tulun ami atu aprende loron-loron atu deskobre moris nia furak liu husi eventu oi-oin maske dala ruma difisil liu, Madre foti mós ezemplu Santa Bakhita nia istoria, nia mak ezemplu feto ne’ebé nakonu ho dosilidade hodi husik buat hotu ne’ebé mosu iha nia moris uluk nian, ho ninia hasoru malu ho Jezús troka nia moris no nia sente katak Jezús hela ona iha nia laran maske nia seidauk koñese.
Ami novisa agradese tebes ba Madre Nieves nia prezensa liu-liu ba liafuan murak sira ne’ebe tulun ami atu deskobre liu tan iha ami nia moris, Maromak nia hakarak ba ami ida-idak hodi la’o hamutuk ho komunidade.
Obridaga barak Madre Nieves, ami haksolok tebes ho ita nia prezensa iha ami le’et.
(Novisa Primeiro Ano)
