Dili – Maski ita moris iha períodu “lockdown”,maibé moris bá oin hanesan ba ema hotu, nune’e mós maiDili – Maski ita moris iha períodu “lockdown”, maibé moris bá oin hanesan ba ema hotu, nune’e mós mai ami”Filhas de Maria Auxiliadora”. Nune’e mak ohin, iha komunidade Eusebia Palomino, ami simu Superiora Provinsiál, Ir Alma Castagna, ne’ebé halo nia vizita kanónika husi 16 to’o 21 Marsu 2021.
Vizita ne’e iha objetivu, hanesan ho Amu-Papa nia mensajen ba Kuarezma, nu’udar tempu atu hafoun fiar, esperansa no karidade. Ir Alma introdús nia vizita ho videoclip Jezús nia aparisaun pos-paskál ba dixípulu sira ne’ebé lakon esperansa, iha tasi-ibun. Hanesan dixípulu sira, parese katak situasaun covid 19 iha tinan ne’e halo ita sente kole, falta entuziazmu… Ita la hein situasaun sai piór, maibé agora “cerca sanitária” kobre sidade tolu… Maromak koko ita-nia fiar… se ita fiar ba Nia ka ba an rasik… Jezús nafatin iha; problema mak rekoñese ninia prezensa! Ita buka hametin ita-nia fiar hodi haree Maromak ne’ebé liu; ita hametin ita-nia esperansa hodi hateke ba futuru no hanoin buat foun ruma atu halo; haforsa ita-nia karidade eh domin hahú husi uma-laran no loke ba li’ur, ba sira ne’ebé presiza liu.
Iha tempu hirak vizita nian, Provinsiál sei haree ho besik, maibé ho matan ema li’ur nian saida mak komunidade nia moris lorloron nian hodi tulun halo dalan bá oin tuir vizaun/ misaun komunidade nian. Husi li’ur, bele haree buat ne’ebé ema iha laran la haree… no ne’e hotu ba kreximentu pesoál no komunitáriu, hametin fidelidade ba karizma no efikásia iha misaun.
Iha Buona Notte, Ir Alma hodi fotu indikasaun husi Señor Luca Attanasio, Embaixadór italianu iha Congo ne’ebé ema oho nia moris.
“Embaixadór ne’ebé sai Reprezentante Nasaun, maibé mós “sasin Sarani Katóliku nakonu ho Karidade”, nu’udar fuan husi edukasaun iha Oratóriu. Señor Luca nia moris fó hanoin katak, edukasaun iha oratóriu, eskola tenke lori atu sai ema ho valór sarani boot, aprende husi ki’ik atu moris karidade no solidariedade. Señor Luca hetan iha oratóriu, pároku ne’ebé hatene kuda valór sarani ba foin-sa’e sira no halo sira sai protagonista. Ne’e mak loloos ita mo tenke halo. Se nia leigu ida sente katak nu’udar embaixadór nia tenke reprezenta Nasaun Itália, ita relijioza sira tenke reprezenta Maromak ne’ebé domin ba maun-alin sira.
(JG)
