Venilale – Iha loron 4 Abril. Loron Páskua, Kristu nia Moris Hias husi mate, sai fundamentu ba ita-nia fiar, esperansa ba moris rohan laek nian no bolun ida atu haklaken Ninia moris hias ba maun-alin sira. Ho ne’e, kolejiu Madre Mazzarello Venilale festeza loron ne’e ho ksolok boot. Festa ne’e hahu ho Eukaristia santa ne’ebé selebra husi Pe. Abrao Pinto Soares, SDB iha kapela komunidade nian. Iha omília Amu selebrante hateten katak; selebra Kristu nia Moris Hias, lori mai ita fiar, perseveransa iha situasaun hotu no haboot ita-nia esperansa iha Nia. Nune’e mós festa ne’e husu mai ita atu sai proklamadór Ninia moris hias nian ba ema hotu hanesan Apóstolu sira no feto balun; Maria Madalena
Hafoin iha loraik, oras 16:00 irmán sira hamutuk ho menina asrama festeza loron ida ne’e ne’ebé sai baze ba ami-nia moris hamutuk no ami ksolok, liu husi drama no knananuk sira Moris Hias nian. Drama aprezenta husi klase idaidak konaba Jezús nia Moris Hias ne’ebé Evanjelista na’in haat haktuir iha Evanjellu. Hafoin Irmán Carolina fó menzajen hodi konklui festa hodi dehan katak; “festeza loron boot sira mak hatudu katak ambiénte Saleziana, no loron ida ohin mak sentru ba ita-nia moris. Selebrasaun sira hahu husi kinta feira, sexta feira no Sabadu Aleluia, ne’ebé na’ilulik sira halo lori mai ita sinal esperansa, ksolok no sentidu fiar ne’ebé klean. Liuliu lilin paskua nian ne’ebé na’ilulik lori tama iha kreda laran fó hanoin mai ita katak Kristu deit mak Lialoos no Naroman mundu nian. Ita simu bolun atu lori esperansa ba maluk sira, iha ita-nia situasaun rai laran nian hodi entrega buat hotu ba Jezús Kristu ita-nia esperansa.
Tuir mai ami oferese Rosariu ba familia no maluk sira iha Dili ne’ebé afeita husi inundasaun boot ne’e, atu Maromak simu sira iha Uma rohan laek ba sira ne’ebé Maromak bolu ona no mós ba sira ne’ebé lakon familia no uma bele hetan lalais tulun husi maluk sira.
(Alice Filipe FMA)
