Papa Francisco iha Albánia
RV – Papa Francisco hateten ohin iha Tirana (Albánia) katak, justifikasaun violénsia nian ba finalidade relijioza mak “sakriléjiu” ida, hodi apela ba diálogu entre komunidade oioin fiar-na’in sira-nian hodi dame nia naran.
“Relijiaun auténtika mak bee-matan dame nian no la’ós violénsia nian. Ema ida labele uza Maromak nia naran, atu halo violénsia. Oho ema hodi Maromak nia naran mak sakriléjiu boot ida.
Diskrimina odi Maromak nia naran mak hahalok dezumanu”, nia hateten, iha diskursu ida iha reprezentante komunidade relijioza boot neen prezente iha Albánia nia oin (musulmanu, sufi, katóliku, ortodoksu, evanjéliku no judeu).
Tuir Amu-Papa, ohin bele haree iha mundu jestu “intoleránsia nian” ba ema ne’ebé iha konviksaun relijioza diferente, ba buat ne’ebé tuir nia tenke rejeita “desididamente nu’udar laloos – basá la soi ba Maromak no ba ema – forma hotu ne’ebé uza relijiaun ho modu laloos.
Ko’alia iha Universidade Katólika, Papa Francisco resalta diálogu no fraternidade ne’ebé komunidade sira moris entre sira, liutiha tinan barak “violénsia no drama nian” tanba rejime komunista sékulu XX nian, ne’ebé promove “ezkluzaun forsada Maromak nian” husi vida pesoál no komunitária.
“Bainhira hakarak, hodi ideolojia ida nia naran, espulsa Maromak husi sosiedade, rezultadu mak adora ídolu [maromak falsu sira], no lalais ema rasik sei lakon, sei hanehan ninia dignidade, viola ninia direitu sira”, Amu-Papa fó hanoin.
Hotu tiha Vésperas ho amlulik no rleijiozu sira, Papa Francisco fila hikas ba Roma, Itália.
