DOMINGU XIII – TINAN A
EVANJELLU – Mt 10,37-42
«Ema ne’ebé hadomi nia aman ka nia inan liu fali Ha’u, nia la soi atu hela ho Ha’u. Ema ne’ebé la lori nia krús hodi tuir Ha’u, nia la soi mai Ha’u». Ema ne’ebé hadomi nia moris, sei lakon nia; no ema ne’ebé lakon nia moris tamba Ha’u, sei hetan fali nia. Ema ne’ebé simu imi, simu ha’u. Ema ne’ebé simu Ha’u, simu ida ne’ebé haruka Ha’u mai. Ema ne’ebé simu profeta ida tan nia profeta, ema ne’e sei simu kolen profeta nian. Ema ne’ebé simu ema los ida tan nia ema loos, ema ne’e sei simu kolen ema loos nian. Ema ne’ebé fó hemu ki’ik-oan sira-ne’e ida, maski bee malirin kopu ida de’it, tan nia Ha’u eskolante, Ha’u dehan lia-loos ba imi; nia sei la lakon nia kolen».
REFLESAUN
Iha Evanjellu ohin ita rona Jezús dehan «Ema ne’ebé hadomi nia aman ka inan liu fali Ha’u, nia la soi atu hela ho Ha’u. Ema ne’ebé ka lori nia krús hodu tuir H’au, nia la soin Ha’u» (Mt 10,37) no ita sai hakfodak. Hodi hakle’an uitoan tan, ita nota lisaun ne’ebé Na’i hakarak tranzmiti mai ita: ba kristianizmu, ida ne’ebé úniku absolutu mak Maromak no ninia Reinu. Ema ida-idak tenke deskobre ninia vokasaun – posivelmente ne’e mak knaar ida delikada liu husi knaar seluk — no tuir ho fidelidade. Se ema sarani ida iha vokasaun matrimoniál, tenke lori ba oin ninia vokasaun katak hadomi ninia família hanesan Kristu hadomi Igreja.
Vokasaun ba vida relijioza ka saserdósiu (amlulik) husu atu tau fiar uluk molok ligasaun ka vínkulu familiár sira, se ho ida-ne’e ita la ba kontra rekizitu báziku karidade kristán nian. Vínkulu familiár sira labele halo ita sai atan no halo vokasaun ne’ebé ita simu bolun bá lakon ka mout. Iha liafua “domin” nia kotuk bele haksumik dezeju atu posui ema seluk ne’ebé bele hasai liberdade atu dezenvolve vida umana no sarani; ka ta’uk atu sai husi knuuk familiár no enfrenta ezijénsia sira vida nian no Jezús nia bolun atu tuir Nia. Ida-ne’e mak deformasaun domin nian ne’ebé Jez’us hakarak atu ita nakfilak ba domin gratuitu no jenerozu, basá, hanesan Santu Agostinho hateten: «Kristu mai atu nakfilak domin».
Domin no simu-malu mak nafatin sai núkleu vida sarani nian, ba ema hotu no, liuliu, ba membru sira família nian, basá sira mak baibain ita-nia maluk sira besik liu no imklui iha “maluk” ne’ebé Jezús husu atu ita hadomi. Iha akollimentu ba ema seluk mak iha akollimentu ba Kristu: «Ema ne’ebé simu imi, simu Ha’u» (Mt 11,40). Ne’e duni, ita tenke haree Kristu iha ema sira ne’ebé ita serví, no rekoñese Kristu servidór iha ema sira ne’ebé serví ita.
