Gleno – Grupu OPIAM sira husi Dioseze 3 konsentra hamutuk iha parokia Gleno hahu dia 19/10 to’o 21/10.
Labarik sira husi kada parókia hamutuk ema na’in 25 mak partisipa iha atividade POM nian iha Gleno. Labarik sira entuziasmu loos ho atividade ne’e. Tinan-tinan nafatin selebra festa mundiál ba misaun iha dioseze ne’ebé determina ona, tinan ida ne’e selebra iha dioseze Dili iha parókia Gleno. Labarik sira hamutuk 5000, madre, padre, frater no formande sira mós barak husi kongregasaun oioin iha dioseze tolu ne’e nia laran. Atividade ne’e organiza husi diretór Nasionál Pe. Mouzinho Lopes hamutuk ho diretór diosezanu sira husi dioseze tolu.
Loron 19/10/2017 mak loron benvindu ba partisipante hotu ne’ebé mai partisipa atividade ne’e. Tuku 5:00 hahú ho Missa abertura ba partisipante sira. Amu Diretór nasionál Missio TL nian mak prezidi Missa Amu Mouzinho Lopes. Iha ninia omilia nia ko’alia kona ba Espíritu Misionáriu mak: Orasaun, Esmola, Sakrifísiu, Sasin. Nia husu ba labarik-adolexente Misionária sira tenke kumpri espíritu hirak ne’e ho di’ak no bele tau iha moris loroloron nian iha família, komunidade, Kreda no nasaun.
Depoizde missa Amu-Bispu husi Dioseze Dili Don Virgilio do Carmo SDB hato’o ninia mensajen ba partisipante sira. Nia hateten: “Durante loron tolu nia laran ne’e haka’as-an atu halo buat 3 ne’ebé hau sei fó ba imi nu’udar T.P.C. Buat tolu ne’e mak: habelun ho Jezús ou Maromak, habelun ho Maluk sira no habelun ho an rasik. Se buat 3 ne’e mak imi konsege halo imi sei moris didi’ak imi nia knaar hanesan labarik no adolexente misionária/u”.
Loron 20/10/2017 hahú ho Missa depois formasaun IAM (Infansia Adolexénsia Misionária) sira animadór/a husi parókia sira iha dioseze tolu ne’e mak fo hamutuk ho madre, padre no frater sira ne’ebé mos akompaña IAM sira. Formasaun / katekeze misiionáriu kona ba OINSÁ MOSU ITA NIA FIAR.
Materiál ne’ebé uza mak foti husi Aman Patriarka sira nia fiar, profeta sira nia fiar, santu sira padroeira misaun mundiál nian no S.João Paulo II ne’ebé sai nu’udar padroeiru Missio TL nian.
Objetivu halo formasaun ida ne’e atu tulun labarik sira hatene oinsá mosu ita nia fiar no fiar nia hun mai husi ne’ebé. Formasaun ne’e halao ho di’ak tanba fahe ba grupu-grupu, iha animasaun no dinámika barak iha grupu.
Kalan iha rozáriu misionáriu ne’ebé diriji husi diretór nasionál hmutuk ho ninia ekipe sira husi animadór/a Nasionál. Iha rozáriu misionáriu ne’e, reza ba kontinente lima iha mundu.
Komunidade FMA sira ne’ebé anima OPIAM mak FMA Baucau, FMA Kailaku, FMA Eusébia-Dili, FMA Maria Auxiliadora Venilale, FMA Laura Vicuña Laga, FMA Balide-Dili.
(Elizita Gonzaga-Grinalda da Costa)
