Venilale – “Tanba buka matenek mak ita hasoru malu, tanba ita-nia futuru mak ita fahe malu”, ne’e mak refraun ne’ebé repete ohin, 11 Novembru, iha loron despedida ba estudante finalista sira iha ETV S. Maria Mazzarello, Venilale. Estudante sira-ne’e totál 53: husi Hotelaria iha 27, mane 9 no feto 18; husi Técnico alimentar iha na’in 26, mane nain rua no feto 24.
Despedida ne’e depoizde exame nasionál, exame lokál no exame hanaran “prova de aptidão profissional” (PAP) tuir rekerimentu husi Ministériu Edukasaun nian. Eventu despedida nian konsiste husi parte sira hanesan “Selebrasaun Eukarístika”, almosu hamutuk, troka malu lia-menon sira agradesimentu nian no dansa.
Amu Abrão Pinto Soares SDB, nu’udar kapelaun eskola nian subliña katak, ita halibur iha ne’e tanba bolun ida no grasa ida: hanesan Don Bosco repete ba oratorianu sira “Na’i-Feto mak lori imi mai iha uma salezianu”. Nia husu atu estudante sira la haluha buat ne’ebé sira aprende, liuliu kona-ba “sai sidadaun onestu no sarani di’ak“. Liuliu iha sosiedade ohin nian, atu keta haluha valór sarani no morál sira nu’udar mata-dalan iha moris ne’e. “Sai ema di’ak, sai sarani di’ak“.
Ida-ne’e mós mak profesór/a sira nia lia-menon, inklui diretora eskola, Ir Fabiola Simões. Ir Floriana Guterres, diretora uma nian ne’ebé iha Jakarta (Indonesia) mós konsege fó na mensajen liuhusi “whatsapp” no dehan ba sira katak, “tempu to’o ona atu sai bá li’ur”, hodi ba enfrenta, ho bukae ne’ebé simu ona, kontinua sira-nia dalan, “la’ós sulan nafatin iha laran”. Ne’e mós mak mestre Cipriano nia mensajen. Nia husu atu alunu ida-idak “sai nia an rasik” no ho “bukae” ne’ebé sira simu iha instituisaun ida-ne’e, sira bele kontinua forma sira-nia an ba futuru, hodi hamorin nafatin sira-nia narna, família nia naran no eskola ne’e nia naran.
Aluna/u sira husi tinan dahuluk no daruak mós hato’o sira nia mensajen. Husi grupu sira hotu, iha-ne’e iha mensajen ida husi turma Alimentar 1: “Ami agradese ba ita-boot sira nia domin, ksolok, pasiénsia ne’ebé fahe hamutuk durante eskola no ih akoléjiu iha tina id ania laran. Ami la iha murak mean atu fó ba it-aboot sira, maibé sei la haluha reza ba ita-boot sira atu maski sai ona husi fatin ida-ne’ keta haluha katak ami antiga/u aluna/u husi ETV S. Maria Mazzarello. Tan ne’e, sai ema maduru no forte, atu hasoru futuru ho ksolok”.
Iha-ne’ebé de’it imi bá hanoin bá katak imi mak Don Bosco, Madre Mazzarello no Na’i-Feto Maria Auxiliadora nia oan sira. Imi kontinua hamutuk ho FMA sira, ho Família Saleziana, iha asosiasaun hanaran “Antiga/u aluna/u FMA nian”. Iha-ne’ebé de’it ita-nia tusan ba malu ida de’it: tusan domin nian!
