Venilale – Depoizde programasaun inspetoriál hala’o iha Dili husi 2 to’o 4 Dezembru, ohin, 28 Dezembru, komunidade edukativa S. Maria Mazzarello Venilale, halibur hamutuk atu halo programasaun komunitária hodi implementa programasaun inspetoriál tuir realidade territóriu nian. Finalidade mak atu ita iha konverjénsia no kontinuidade iha ita-nia asaun edukativa hotu.
Partisipante ba programasaun mak Irmán na’in 8 komunidade FMA nian (Ir Jacinta Gusmão, Ir Yasintha Bria, Ir Santina Guterres, Ir Fabiola Simões, Ir Alexandrina Pinto, Ir Áurea Freitas, Ir Maria Natalina da Costa no Ir Libanha Moniz), leigu/a no foin-sa’e sira (Cipriano, Terezinha, Manuel, Domingos, Josefina no Daniel).
Programasaun, bele dehan, hahú ho enkontru komunitáriu FMA sira-nian ba loron rua, iha-ne’ebé sira buka reflete no fahe kona-ba “Elementu saida de’it mak tulun ha’u iha unifikasaun interiór, atu moris grasa unidade vokasionál; saida mak signifikadu komunidade nian mai ha’u no sá los ha’u nia kontribuisaun ba komunidade; hodi hateke ba Don Bosco (Ha’u ba imi estuda, ba imi serbisu, ba imi moris, no ba imi prontu atu saran ha’u-nia moris) no Madre Mazzarello (A te le affido), oinsá ha’u moris misaun edukativa entrega mai ha’u?” Reflesaun no partilla uluknanai halo tuir grupu idade no etapa formasaun nian (segunda idade, primeira idade, juniora no novisa) no hafoin mak fahe ba hotu-hotu.
Programasaun ohin nian, hahú ho orasaun abertura hodi invoka Espíritu Santu no rona Maromak nia Liafuan no foin-sa’e sira nia hakilar ne’ebé sadik ita-nia komunidade. Maromak nia Liafuan foti husi Evanjellu Jo 6,1-14 kona-ba labarik ida ne’ebé oferese paun lima no ikan rua ba Jezús atu rezolve hamlaha ema rihun lima nian, hatudu katak joven sira la’ós problema maibé halo parte solusaun nian: sira mós bele fó 
sira-nia kontribuisaun, sira mós protagonista iha moris ne’e.
Iha parte dadeer partisipante sira elabora liña asaun no modalidade sira implementasaun nian, nune’e mós materiál, data no ema rekursu. Elabora tiha, partisipante sira oferese sira-nia programa ne’e ba Maromak durante selebrasaun eukarístika, prezide husi P. Abrão, kapelaun komunidade nian.
Depoizde almosu hamutuk, partisipante sira haree ba kalendáriu tinan tomak nian, atu integra atividade sira hodi konfronta ho eventu sira husi lokál, nasionál/inspetoriál no Kreda universál nian.
Agradese ba Maromak, agradese ba membru ida-idak nia kontribuisaun di’ak, buat hotu bele remata no iha tuku 3.30 loraik, komunidade taka ho invokasaun ba Na’i-Feto, ne’ebé sai prezensa Inan, Gia no modelu ba edukadór/a sira hotu.
