Dili – Iha 28 Abril 2018, Irmán Perpétua husi zona Dili hamutuk 19 ne’ebé ohin partisipa enkontru hamutuk ho Madre Alma Castagna, nu’udar acompañadora ba Formasaun Irman sira nian iha Inspetoria TIN (Timor- Indonesia). Enkontru ne’e hahú ho orasaun ne’ebé prepara husi Madre Alma rasik nudar gia ba ami nia enkontru ne’e. Enkontru ne’e sai hanesan sasukat ida ba ami ida-idak hodi haree fila fali ba ami nia moris nu’udar feto konsagrada ne’ebé kontempla Kristu hodi rona Maromak Nia Liafuan iha moris loroloron nian.
Moris konsagrada hahú hodi rona Maromak nia liafuan no simu Evanjellu nu’udar refraun moris nian. Vokasaun ida-idak ba moris konsagrada hahú husi kontemplasaun, hahú husi momentu sira komuñaun no relasaun kle’an amizade nian ho Kristu, husi fafurak no roman ne’ebé haree naksira iha 
Ninia Futar Oin. Madre Alma mós haktuir kona ba esperiénsia Kardeal Martini nian ne’ebé liga esperiénsia Orasaun ho kontemplasaun. Kardeal kaer liafuan ”Moris tuir Biblia iha silénsiu” ne’e bele troka ema nia moris. Esperiénsia ne’e hahú ho jovens sira iha sidade Milano. Joven sira hahú kaer Biblia reza iha silénsiu, hodi nonook, laiha muzika instrumental ka knananuk ruma ne’ebé bele disturba sira nia orasaun. Kontempla Kristu mak lori ema atu rona Maromak nia Liafuan ho roman dixernimentu nian, ne’ebé husi hakbesik Maromak Nia Liafuan to’o ba aprende hanesan instintu sobrenatural.
Iha mós atividade sira ne’ebé halo ba Irman sira kona-ba kompleta fraze Biblia nian ne’ebé halo ami ida-idak buka hakaas an atu medita no asimila Maromak Nia Futar Lia hodi sai aihan ba ami nia vida espirituál nu’udar feto konsagrada ne’ebé hamrook bebeik ba Maromak Nia Liafuan.
Iha mós parte karizmatika nian, ko’alia kona ba “Rona Maromak Nia Liafuan nu’udar Saleziana”.
Iha planu Formasaun FMA nian, koalia kona ba Karizma nia dimensaun profétika ne’ebé dehan: ho modun kriativu ne’ebé sempre kontaktu ho foin-s’ae sira ho identidade nu’udar Feto konsagrada ne’ebé lori mistériu Maromak nian, ho kontinuamente rona Maromak Nia lian atu bele aprende matenek moris nian ne’ebé loos. Hakbesik Maromak nia Liafuan ho estilu espesifiku Salezianu, halo parte ba “Sensibilidade Karizmatika”. Esperiénsia pesoal kona ba Kristu ne’ebé Don Bosco no Madre Mazzarello esperiénsia, mak xave atu interpreta Maromak nia Liafuan ho modu Salezianu, katak Don Bosco no Madre Mazzarello nia moris no obra sai ba ita “ Maromak Nia Liafuan inkarnada (Ne’ebé hola isin).
Iha ita nia Kapitulu Jeral XVI dehan: Ita nia misaun edukativa ezije ba FMA ida-idak dinamizmu kle’an interioridade edukativa nian. Interiorioridade iha Maromak nia Liafuan.
Ikus liu taka ho Madre Mazzarello nia karta ou surat sira ne’ebé hakerek ba Irman sira ho modun Evanjellu nian ne’ebé grupu ida-idak foti fila fali hodi konfronta ho liafuan sira iha Biblia. Surat Madre Mazzarello nian ho numeru: 25, 29 e 37, koalia kona ba: Haksolok nafatin, hadomi malu nu’udar bin alin, laran metin iha Jesus, Fo ezemplu diak ba malu, buka nafatin sai fuan ida deit iha Kristu no seluk tan.
(Ines Bartolo F.)
