Kailako – Eventu importante ne’ebé Evanjelista S.Lukas subliña iha Lukas 1:39-40 mak vizitasaun Maria nian (Iha loron hirak ne’eba Maria hit-an lalais ba foho, ba knua ida iha Juda. To’o tiha Zakarias nia uma nia kumprimenta Isabel). Asaun karitativa ne’ebé Maria halo ohin loron kontinua nafatin liu husi nia prezensa ativa iha sarani ida-idak nia moris. Ema ida-idak iha nia esperiénsia pesoál ho Maria nia prezensa iha ninia viajen moris nian.
Ohin loron Maria kontinua sai tulun-na’in ba sarani sira iha sira nia hela fatin. Nia kontinua nia viajen hodi vizita nia oan sira maske hirak ne’ebé hela iha periferia. Nia kontinua peregrina hamutuk atu rona nia oan sira nia halerik, susar no terus.
Kreda universál ne’ebé dedika fulan ida ne’e nu’udar fulan Maria nian, sai okaziaun di’ak ida ba ita hotu atu hametin no haklean fali ita nia devosaun no domin ba Maria hodi tulun mós sarani sira atu buras iha sira nia devosaun ba Maria.
Nu’udar komunidade ami mos hakas-an hodi ajuda sarani sira iha Kailako liu-liu sira ne’ebé hela iha periferia atu hametin sira nia devosaun ba ita Na’i-Feto.
Iha 1 Maiu depoizde missa sarani sira husi bairru sira halo prosisaun hodi lori Na’i-Feto ba sira nia bairru. Iha balun ne’ebé iha foho ne’ebé izoladu mós mai husu atu bele lori Na’i-Feto ba vizita sira. Atu bele tulun sira reza di’ak Ir. Virgilia prepara livriñu rozariu meditativu nune’e sira bele uza iha ida-idak nia bairru. Irmán hotu pronta atu ba vizita bairru sira hodi reza hamutuk no fó reflesaun ka formasaun.
Nu’udar Maria nia oan feto sira, ita sei haboot liutan ita nia devosaun no domin ba Nia. No tulun foinsa’e, labarik no sarani sira atu hatene kuda devosaun ba Maria ita Inan doben.
(Albina Carmo)
