Venilale – Tinan-tinan iha Escola-Técnico-Vocacional Hotelaria e Turismo S. Maria Mazzarello, nafatin hala’o festa Madre Mazzarello, padroeira escola nian hamutuk ho inan-aman sira. Festa padroeira nian lori atu inan-aman husi fatin dook sira bele mai to’o iha Venilale, tanba iha “overnight” (4-5 Maiu 2018). Iha okaziaun ne’e profesór/a sira bele hasoru malu ho sira, hodi iha komunikasaun kona-ba prosesu ensinu-aprendizajen iha ETV, hanesan haree ho matan rasik saida mak alunu/a sira aprende liuhusi atividade expo, organiza festa ka eventu ida, no simu kaderneta primeiru trimestre nian.
Maibé la’ós de’it ida-ne’e. Momentu ne’e sai mós momentu formasaun hamutuk. Iha tinan ne’e, tema formasaun nian mak “Família iha Bíblia”. Inan-aman no oan sira, nune’e mós mestre balun fahe ba grupu lima: família Abraão no Sara nian; família Rut nian; família Tobias nian (Tobit-Ana; Raguel-Edna; Tobias-Sara); família Zacarias no Isabel nian no família Nazaré nian. Iha grupu liuhusi leitura Bíblia nian no pergunta ruma atu hatán, sira buka deskobre oinsá dalan família bíblika partikulár ne’e nian, ne’ebé liuhusi difikuldade sira hasoru iha etapa oioin moris nian, tulun iha sira-nia kreximentu atu kumpre projetu ka misaun ne’ebé Na’i entrega ba sira-nia moris “hamutuk”. Iha kalan, iha tempu orasaun molok toba, reprezentante ida-idak fahe ba hotu-hotu saida mak sira deskobre iha istória bíblika.
Loron sábadu hahú Missa S. Maria Mazzarello nian selebra husi Pe. Abrão no konselebra husi Pe. Júlio Mota SDB. Iha omilia Pe. Abrão subliña knaar família nian ne’ebé sai rai-isin atu moris no domin buras (kf Estreia 2017) no aprezenta virtude rua Madre Mazzarello nian, “haraik-an” no “simplisidade” ne’ebé bele tulun ita buras iha moris família, família iha-ne’ebé iha komunikasaun kle’an, iha domin.
Hafoin iha enkontru ho diretora eskola, Ir Fabiola ne’ebé uza atu klarifika kestaun ruma ne’ebé inan-aman sira husu kona-ba selu eskola fulan 12, atividade estájiu, ezame finál PAP (Prova de Aptidão Profissional). Aleinde ne’e, nia husu atu inan-aman fó apoiu másimu ba oan sira, tanba eskola ida naran tékniku-profisionál, husu empeñu maka’as husi estudante sira, iha teoria no iha prátika.
Atividade seluk mak molok ba haree expo, inan-aman iha oportunidade atu haree rezultadu atividade estra-kurrikulár sira ne’ebé iha trimestre ne’e liga liu ho “ekolojia integrál” no hatudu alunu sira-nia kriatividade no talentu. Eskola halo konkursu sira kona-ba hananu nian (prémiu 
dahuluk ba Hotelaria 2), kona-ba halo video-clip Ponte Natureza (primeiru lugar grupu Don Bosco), kona-ba resiklajen (primeiru lugar Hotelaria 1) no sala-de-aula ne’ebé moos no dekora furak liu (Alimentar 1). Konkorrente sira ne’ebé manán simu prémiu iha loron ne’e. Programa ikus mak almosu hamutuk no hasoru professora turma nian hodi entrega kaderneta.
Prezente iha atividade aleinde estudante na’in 194, membru korpu dosente 27, inan-aman no parente liu 400, iha mós padre kapelaun, Pe. Abrão no komunidade FMA Maria Auxiliadora ho formanda sira.
Ami hakarak agradese ba Maromak ba ézitu festa nian no agradese tebes ba ida-idak no hotu-hotu nia kontribuisaun, inklui mós família ne’ebé empresta tenda atu hamahan an husi loron manas.
