Vizita kanónika Inspetora nian iha komunidade Laga

Laga – Ami komunidade Beata Laura Vicunha, hamutuk ho komunidade edukativa no Ov live in weekend sira, simu Madre ho ksolok no domin boot, liu husi ami nia dansa no koreografia “Seja Bemvinda. A minha casa sarai teu casa e a minha familia teu lugar” no orasaun hamutuk, iha loron 27 Juñu 2018.
Ba ami Madre nia prezensa mak prezensa inan nian, ne’ebe lori Grasa mai ami hodi hametin ami irman ida-idak nia fidelidade no laran manas ba misaun hodi serbisu hamutuk ho familia Salesiana sira atu manan klamar sira nia diak. Hanesan iha konferensia ne’ebe madre dehan; ” vizita ida ne’e mak bele sai tempu salvasaun nian” nune’e Madre foti personajen Emaus nian hodi dehan: ne’e mak momentu atu rona, fahe no presiza halo dixernimentu ba buat ne’ebe la’o tuir Maromak nia hakarak.
Ami taka vizita ida ne’e ho solene liu husi misa iha dader hamutuk ho labarik sira, irman, OV weekend no komunidade edukativu. Iha kalan ami hato’o ami nia agradesementu ba Madre liu husi teatru “NA’I HARAIK BE’E NE’E MAI HAU “ iha ne’e mak ami espresa ami nia ksolok loro-loron nian, domin no ami nia gratidaun ba Madre. No liuhusi teatru ida ne’e interpella ami nia hakarak atu moris hamutuk hodi tau matan ba malu ho ksolok. Ksolok ne’ebe suli hamutuk hanesan mota hodi hatutan ba oceania boot ida.
Iha Domingu Madre ba vizita Oratoriano sira iha Nunira. Oratoriano sira simu Madre ho solene liu husi dansa no teatru konaba Madre Mazzarello nia moris no nia hakarak atu mai Timor. Oratoriano sira nia inan aman kolabora hodi prepara almosu ba oratoriano sira besik 200 hodi han hamutuk ho Madre Provinsial. Ami hotu haksolok tebes ho visita kanonika ida ne’e no haree katak tempu pasa lalais no remata ona visita kanonika.
Obrigada wain Madre Alma ba entusiazmu, ksolok ne’ebe hada’et no halo ami hotu senti duni uma ho ita boot. Ate tinan oin!….
(Onesiana Baptista)