Pansol/Calamba (Filipinas) – Atu prepara an ba selebrasaun tinan 25 profisaun relijioza nu’udar FMA dahuluk iha Timor-Leste, Ir Olga Belo, Ir Alexandrina Pinto no Ir Jacinta Gusmão hakat ba Filipinas atu halo retiru anuál hamutuk ho kolega sira grupu “Diamonds” ka “Diamante” sira. Grupu diamante kompostu husi Irmán sira husi Filipinas, China no Timor-Leste, no halo profisaun dahuluk iha tinan 1993.
Retiru ne’e nia fasilitadora mak Ir Nora Hernandez FMA hala’o husi loron 22 Jullu no remata 28 Jullu ho renovasaun votus. Tema Ezersísiu espirituál nian mak “Buat hotu tanba Domin” ne’ebé halo ho enkontru 9: kestaun ida domin nian; hetan impulsu husi domin; haree ho matan fiar no domin nian ka kontemplasaun; ha’u-nia resposta domin nian: votu sira; ha’u-nia moris domin nian iha komunidade; mediadora sira Maromak nia domin nian / misaun domin nian; hadomi iha tinan sira moris nian; fidelidade iha domin.
Loroloron Ir Nora aprezenta reflesaun ida no iha kalan Irmán sira fahe esperiénsia ne’ebé sira halo kona-ba tema partikulár ida… Porezemplu, “oinsá ha’u-nia ‘love-life” ho Jezús”?
Aleinde momentu retiru, iha mós momentu atu haksolok hamutuk, ba vizita ami-nia uma formasaun sira hanesan aspirantadu/postulantadu no novisiadu, no mós vizita ema signifikativu ruma mai ami, hanesan Pe. Renato Molina SDB no família madre Maria Fe Silva nian. Momentu sira-ne’e ami halo depoizde retiru.
Irmán FMA sira husi grupu Diamonds agradese tebes ba Inspetora sira ne’ebé oferese oportunidade ida-ne’e mai ami. Amin nia tristeza mak ami-nia kolega na’in rua la partisipa: Ir Pamela Vecina, misionária iha Papua New Guinea ne’ebé la hetan lisensa husi esokola nia hanorin atu mai no Ir Floriana A. Guterres ne’ebé bá selebra ketak iha Lalehan.
