Laga – Iha 19 Agostu loraik representante MJS sira husi kada komunidade SDB-FMA to’o iha Laga. Uluk nanain: Hahu kedas ho orasaun abertura no Boanoite husi padre Rui Gomes, SDB, amu paroko Laga nian. Boanoite hotu tiha, apresentasaun relatorio badak husi strutura tuan sira kona ba atividade MJS durante tinan lima (5), ne’ebe realiza ona iha zona pastoral sira no ikus mai iha Dili mak remata sira nia responsabilidade ikus nian ho RetÓr Mor nia presensa. Hanesan Afonso ne’ebe nu’udar presidente hato’o ba kandidatu estrutura foun sira katak sira kontente tamba ikus nian forum MJS iha Dili mak Padre no madre sira hahu fo laran metin ba sira nu’udar protagonista atu organiza festa MJS nian ne’ebe lao ho susesu maske iha mos failansu sira.
Iha loron tuir mai, dia 20 hahu ho formasaun kona ba pedagojia salesiana (Sistema Preventivu) ne’ebe padre Silvano, SDB mak aprezenta topiku ne’e. Nia hahu nia esplikasaun hodi dehan katak SP mak uluk nanain espresaun domin Maromak nian ne’ebe aplika iha sistema DB no MM nian. nia esplika mos diferensia entre sistema preventive no sistema represivu, hafoin esplika SP liu-liu moris konkretu nian. Tuir mai iha animasaun husi animadores sira hafoin kontinua ho madre Olga da ConseiÇão Belo, FMA ne’ebe koalia kona ba espiritualidade Joven salesiana ho elementu lima hanesan tuir mai ne’e:
- Maromak nia presensa
- Hala’o knar ho ksolok no responsabilidade
- Domin ba sakramentu sira
- Domin ba Nain Feto Maria Auxiliadora
- No ikus nian domin ba kreda.
Esplika hotu tiha fahe ba grupu lima no iha grupu laran animadores sira foti elementu ida, hodi reflete, sharing iha grupu hodi liga iha sira nia moris konkretu, hafoin sira apresenta iha asembleia, ikus nian madre taka ho resumu badak.
Tuir mai Padre Alarico Tomas Sarmento, SDB nudar engkaregado MJS nian, hato’o nia intrudusaun badak molok tama iha eleisaun ba estrutura foun. Estrutura foun hala’o ho diak, livre no responsavel. kandidatu sira mai husi komunidade hotu hamutuk 38 pesoas maibe komunidade walu mak hetan fiar atu nomeia nia animador/a sira. ikus mai komunidade Balide nia animador: Afonso Rafael Monteiro mak nu’udar presidente, Zaqeus husi Fuiloro komunidade SDB, nu’udar vise, Belina nu’udar Tesoreira husi CPN Comoro, Rita husi CPN nuu’udar sekretaria.
Ikus mai remata ho agradesementu husi Pe.Alarico hodi kongratula estrutura foun MJS tinan 2018-2021 no tempu hanesan agradese mos ba komunidade Laura Vicuña ne’ebe fo fatin hodi halao aktividade MJS nian ho diak. hafoin komunidade ida-idak fila ba sira nia fatin.
(Armenia Menezes)
