Sínodu joven (3-28 Outubru 2018)
Roma (Italia) – “Rona, empatia no fatuk ne’ebé ema hewai”: ne’e mak liafuan sira ne’ebé ko’alia barak iha Asembleia jerál sínodu nian ba XV kona-ba tema: Joven sira, fiar no dixernimentu vokasionál” iha loron dahuluk sira-ne’e. Tema oioin mak ko’alia ona iha loron sira ne’e hanesan paternidade no maternidade, kestaun kastidade nian no teoria jéneru, nune’e mós dezafiu sira “era dijitál nian”, no temi mós kona-ba “bulimia meiu sira nian no anorexia finalidade nian”. Joven sira, tuir portavós ba jornalista sira, “sente sai vítima ba sosiedade ida bazeia ba laran-makerek “ no husu atu “rona sira”, atu “sériu” kona-ba buat ne’ebé sira hateten.
Kreda ninia “vergonha” (moe) ba abuzu sira nia halo
Mons. Anthony Colin Fisher, Padre sinodál eleitu husi Konferénsia episkopál Austrália no arsebispu Sydney nian, dala ida tan husu perdaun ba abuzu sira. “Ita presiza asegura katak Kreda sai fatin seguru ba labarik sira”, nia dehan ba jornalista sira, “ami sente moe ba buat ne’ebé akontese”. “Iha joven barak no eis-joven sira, kanek”, nia hatutan, ema ne’ebé sente ami halo traisaun ba sira: “Kreda tenke ko’alia ba sira no la’ós kona-ba sira, hanesan fenómenu ida”.
Afetu no joven sira nia esperansa
Arsebispu Sydney nian ko’alia mós kona-ba “variedade” boot kontestu sira nian ne’ebé mosu iha aula Sínodu nian; “realizmu” intervensaun sira-nian; afetu no “esperansa” ne’ebé respira iha konfrontu ho joven sira. “Kristu mak Maromak alo an joven – nia insiste – Nia hafoun ita, hanesan hafoun mundu ho joven sira, husi jerasaun ida ba jerasuan seluk”. Mons. Manuel Ochogavía Barahona, Padre sinodál eleitu husi Konferénsia episkopál Panamá nian no bispu Colón-Kuna Yala, hateten katak oras-ne’e iha serbisu boot preparasuan nian ba Jornada Mundiál Juventude 2019 ho formasaun juveníl iha Amérika Latina no Caraibi. “Joven mak espasu ida iha-ne’ebé Maromak ko’alia mai ita” no Kreda ohin simu bolun atu besik ba joven sira ho “kompaixaun:, hodi rona buat hotu ne’ebé akontese iha sira-nia ezisténsia.
Sínodu ida ho kór sira mundu nian
Iha briefing ba jornalista intervein mós auditora (rona-na’in) mai husi Madagascar Tahiry Malala Marion Sophie Rakotoroalahy, prezidente nasionál Estudente Katóliku sira-nian. Nia deha katak Sínodu mak “pontudepartida: mi “bensan loloos ida” ba joven sira, ne’ebé “tenke sai apóstolu entre maluk joven sira seluk”. Hodi ko’alia ho modu partikulár kona-ba realidade rasik, nia husu atu iha atensaun ba liturjia, atu bele besik liu ba joven sira no iha kbiit atu halakon “fenómenu seita sira-nian”.
