Loron Mundiál Misaun 2018
Dili – Amu-Papa Nia mensajen ba loron mundial tinan ida ne’e ho tema “ Hamutuk ho Joven sira ita lori Evanjellu ba ema hotu”. Iha fulan outubru mak fulan ba misionaria nian, ami nia oratoriu hala’o aktividade oi-oin, atu selebra no sensibiliza festa ida ne’e, hodi hahu tuir formasaun zonal ba animador sira husi padre Manuel Fraile SDB ne’ebé halo reflesaun kona ba Amo Papa nia mensajen ba loron mundial ba misaun nian ne’ebé tulun animador sira hodi konxiente ba sira nia an nudar sarani ne’ebé simu bolu atu fo sasin kona ba sira nia fiar hodi hadaet fiar to’o mundu nia rohan, katak knar nebe importante liu iha Kreda mak hadaet fiar ho domin nebe hamosu ksolok no entuziasmu. Liu –liu iha Amo Papa nia mensajen hafanu fali ami hodi dehan: “iha kedas imi nia batizmu, imi mos sai Kreda nia membru sira. hamutuk ita simu misaun atu haklaken Evanjellu ba ema hotu...”
Tan ne’e nu’udar impeῇu ba misaun ami grupu ida idak iha oratorio halibur hamutuk sasan material ruma hodi bele halo asaun karidade ba familia mukit sira iha ami nia bairo, ami joven ho animador sira halo visita ba joven sira iha tasi ibun liu liu iha Palasio do Governu nia oin hodi halo animasaun no dialogo livre no konvida maluk joven sira atu hakbesik an ba Jezús nia Evanjellu.
No ohin loron 21 outubro 2018 ami oratorianu Balide kompostu husi animadores, foinsa’e, labarik no inan aman sira hodi selebra loron mundial 
ba misaun, ami reza “Tersu misionaria” hamutuk iha GYM Balide hodi oferese ba rai misaun, molok hahu orasaun, ami animador sira fahe ba labarik no joven ida idak Nasaun sira ne’ebé iha Kontinente lima nia laran, atu sira bele reza ba misionaria/o sira ne’ebé serbisu iha Nasaun refere, atu ho Nai Nia tulun sira bele hetan korajen no aten brani hodi fo sasin nafatin kona ba Jezús nia domin.
Ami agradese ba oportunidade ida ne’e, ne’ebé halo ami hadomi Kristu nia misaun, maske ami la ba rai misaun maibe sai misionario iha ami nia uma, eskola no iha fatin ne’ebé ami serbisu ba. Ami agradese mos ba misionario/a sira ne’ebé lori ona Jezús ba ami iha rai Timor liu- liu hamutuk ho ami iha oratorio iha Madre Maria Letizia ne’ebé nafatin besik ami ho fuan inan nian.
Ikus ami konvida maluk joven sira atu hametin ita nia fiar iha Jesus hodi brani fo sasin kona ba Jesus iha ita nia moris loroloron nian.
(Afonso Alves Soares no Abelina da Cruz)
