Baucau – Domingu datoluk Adventu nian, domingu ksolok nian tanba Na’i nia vinda besik daudaun. Iha komunidade Baucau ksolok ne’e aumenta tanba ohin irmán Paola Battagliola, Inspetora FMA TIN, mai vizita komunidade iha oras ruma hodi entrega livriñu programasaun 2014 ba komunidade edukativa Baucau.
Leiga sira ne’ebé tuir programasaun iha loron 8 Dezembru iha DIli, foin-sa’e no labarik ruma halibur iha komunidade St. Teresa d’Avila, Baucau no liuhusi orasaun badak irmán Paola konvida hotu atu halo dalan hamutuk hodi buka moris tuir objetivu sira ne’ebé propoin ona ba tinan 2014: 1) haburas vida interiór/espirituál; 2)prontu atu fó no simu perdaun; 3) asume ezijénsia cetera tolle nian inklui moris iha sobriedade no audelimitasaun nu’udar alternativa evanjélika ba konsumizmu nune’e sai sasin ba pobreza.
Iha ninia liafuan aprezentasaun nian irmán Paola konvida komunidade dukativa atu “kompromete an atu moris didi’ak okaziaun selebrativa sira, okaziaun formativa no edukativa sira ne’ebé oferese mai ita atu intensifika dalan korresponsabilidade nian iha atualizasaun Karizma nian no atu hamoris Komunidade Edukativa ho kbiit atu haklaken – ho modu foun no hatene envolve ema liután – Liafoun Di’ak Evanjellu nian”.
Hodi la’o ho Kreda no tuir Amu-Papa nia solisitasaun, FMA, leiga/u no foin-sa’e sira sei buka atu sai sasin ksolok-na’in no sasin barani-na’in Maromak nia Liafuan iha ksolok.
Ikone/ilas Maria ho João iha krús hun ne’ebé hili ba Tinan Pastorál 2014 sei tulun ita “lori Maria” iha uma ita-nia fuan nian, nune’e ita-nia fuan bele sai hanesan Maria horik-fatin Liafuan nian iha ne’ebé bele nalian “Evanjellu ksolok nian”.
Hotu tiha selebrasaun entrega programa tinan 2014, irmán no leigu sira halo momentu badak konfraternizasaun nian, hafoin ida-idak fila ba uma ho empeñu atu hasoru malu fali ba programasaun lokál iha loron 30 Dezembru iha tuku 3 loraik. Irmán Paola fali kontinua ninia viajen ba Laga no Fuiloro.
