Dili – Grupu ki’ik-oan ida halo enkontru vokasionál, loron 23 Fevereiru, iha komunidade Divina Providénsia, Comoro-Dili. Sira-nia modelu enkontru mak lectio Maromak nia Liafuan no sharing, anima husi Ir Marta. Pasajen ne’ebé sira reflete foti husi Evanjellu João 1,35-51.
Maromak nia Liafuan:
«35Liu tiha loron ida, Joao hamutuk hela ho nia eskolante na’in rua. 36Wainhira hare Jesus ne’ebé liu dau-daun, nia dehan: “Maromak nia Bibi Oan mak neba!” 37Rona tiha lia hirak ne’e, eskolante na’in rua ne’e tuir Jesus. 38Hare sira tuir Nia, Jesus fila hodi husu ba sira: “Imi buka sa ida?” Sira hatan: “Rabbi, katak Mestre, Ita hela iha ne’ebé?” 39Jesus dehan: “Imi mai hare.” Sira ba duni, hodi hare Nia horik iha ne’ebé. Loron ne’e duni sira hela ho Nia kala tuku haat loraik. 40Sira na’in rua ne’ebé rona Joao hodi tuir Jesus ne’e, ida mak Andre, Simao Pedro nia alin. 41Nia hetan uluk nia maun Simao hodi dehan: “Ami hetan ona Messias!” katak “Kristu.” 42Nia lori Simao ba Jesus. Jesus fihir nia, dehan: “O Simao, Joao nia oan; o sei hanaran an Cefas, katak Pedro.”
43Liu tiha loron ida, Jesus hanoin atu ba Galileia. Nia hetan Filipe hodi dehan ba nia: “Tuir Ha’u mai!” 44Filipe ema Betsaida, Andre no Pedro nia knua. 45Filipe hare Natanael hodi dehan ba nia: “Ami foin hetan Ida ne’ebé Moises no profeta sira fó sai nanis, katak Jesus, Jose nia oan, housi Nazare.” 46Natanael hateten: “Buat diak ida bele mai housi Nazare?” Filipe hatan ba nia: “O mai hare.” 47Hare Natanael hakbesik ba Nia, Jesus dehan kona ba nia: “Ida ne’e mak ema Israel lo-los, iha ne’ebé la iha lia bosok!” 48Natanael husu ba Nia: “O hatene ha’u oin sa?” Jesus hatan: “Molok Filipe bolu o, Ha’u hare ona o iha ai figueira okos.” 49Natanael dehan fali: “Rabbi, Ita mak Maromak nia Oan, Ita mak Israel nia Liurai!” 50Jesus hatan: “Tan Ha’u hateten ba o katak Ha’u hare ona o iha ai figueira okos, mak o fiar? O sei hare buat boot liu ida ne’e.” 51Hafoin Jesus dehan ba nia: “Los duni, Ha’u dehan ba imi katak imi sei hare lalehan nakloke, Maromak nia anju sira sa’e tun ba Oan Mane.” »
Konteúdu partilla nian ne’ebé ida-idak fahe:
*”Ida ne’e mak ema israel loloos,iha nia la iha lia bosok iha nia”: pasajen ne’e hakarak fó hanoin katak dala barak liu ita bosok ita nia maluk no família sira tan sira lahatene maibé Maromak hatene ita ida idak no Nia hatene saida mak ita halo nune’e iha pasajen ida-ne’e fó hanoin mai ita atu labele bosok no haka’as an iha moris lor-loron nia atu labele repete tan hahalok ida ne’e (Lidia).
*”Tan ha’u hateten katak ha’u haree ona ó iha ai figeira okos, mak ó fiar? Ó sei haree buat boot liu fali ida ne’e”.
Ha’u hakarak reflete kona ba fraze ida ne’e tanba dala barak ha’u mós hanesan Natanael ne’ebé fiar namlele no nia fiar tanba Jezús dehan ba nia “ha’u haree ó iha ai figeira okos”; tan ne’e ha’u buka haka’as an atu tau fiar metin iha Maromak liu husi Evanjelu no mós atu haklean liutáan fiar ida-ne’e iha moris lor-loron nian (Teresa).
*”Mai no haree”
Tanba dala barak ita la metin ba ita-nia hanoin no mehi ba futuru nune’e iha Evanjellu ne’e fo hanoin mai ha’u atu koko hodi deskobre ita-nia mehi atu bele realiza iha futuru nune’e ha’u “mai no haree” (Abiuda)
*”Mai no haree”
Tanba dala barak ha’u gosta halo buat ne’ebé mak fasil duké difisil, baruk atu bá no haree maibé hakarak atu haree direitamente kedas nune’e iha Evanjelu ne’e Maromak bolu ha’u atu “mai no haree” (Domingas).
* “Diálogu entre Filipe, Natanael ho Jezús”
Ha’u sente dalabarak ha’u hanesan Natanael, la signifika katak ha’u la iha lia bosok maibé dalaruma ha’u hanoin madre no padre sira mak hanesan Filipe ne’ebé fó hanoin mai ita katak ó iha vokasaun maibé ha’u hanesan Natanael ne’ebé lametin iha ha’u nia an ne’e mak ha’u husu ba ha’u-nia an katak ha’u presiza hasoru no koko atu nune’e bele hatene katak ida-ne’e mak ha’u-nia dalan ka lae (Jenifer).
(Teresa Gama-Jenifer Soares)
