Maun no biin-alin sira, bondia!
Iha Evanjellu ohin nian (kf Lc 9,51-62), S. Lucas hahú haktuir Jezús nia viajen ikus nian ba Jerusalém, ne’ebé taka iha kapítulu 19. Ne’e viajen naruk ida la’ós de’it jeográfika no espasiál, maibé espirituál no teolójika ho diresaun ba hala’o misaun Mesias nian. Jezús nia desizaun radikál no totál, no ema sira ne’ebé tuir nian simu bolun atu sukat an ho ida-ne’e. Evanjelista aprezenta ohin personajen na’in tolu – kazu tolu vokasaun nian, ita bele hateten nune’e – ne’ebé haroman kona-ba saida mak husu husi ema ne’ebé hakarak tuir Jezús didi’ak, totalmente.
Personajen dahuluk promete ba Jezús: «Ha’u sei tuir Ita bé iha-ne’ebé de’it Ita bá» (v. 57). Laran-luak! Maibé Jezús hatán katak Mane Makso’in, diferente ho asu-fuik sira la iha nia fatuk-kuak no diferente husi manu-fuik sira ne’ebé iha knuuk, «la iha fatin atu sadere nia ulun bá» (v. 58). Pobreza absoluta Jezús nian. Jezús, defaktu, husik aman nia uma no heuai seguransa hotu atu haklaken Maromak nia Reinu ba bibi sira nia povu nian ne’ebé lakon. Nune’e, Jezús hatudu mai ita ninia eskolante sira katak ita-nia misaun iha mundu labele estátika, maibé itinerante (halo dalan). Ema sarani ema itinerante. Kreda tuir natureza mak Kreda iha movimentu, nia la tur metin no hakmatek iha ninia luhan rasik. Nia nakloke ba orizonte luan, Na’i haruka – Kreda simu mandatu atu bá! – lori Evanjellu ba lurón sira no to’o iha periferia umana no ezistensiál sira. Ida-ne’e mak peronajen dahuluk.
Personajen daruak ne’ebé Jezús hasoru simu bolun diretamente husi Nia, maibé nia hatán: «Na’i, husi ha’u bá uluk hakoi ha’u-nia aman» (v. 59). Ida-ne’e pedidu lejítimu ida, bazei ba ukun-fuan atu hamta’uk aman no inan (kf Ex 20,12). Maibé Jezús hatán: «Husik mate sira hakoi sira-nia mate» (v. 60). Ho liafuan hirak ne’e, ne’ebé iha intensaun provoka, Nia hakarak afirma primadu atu tuir no haklaken Maromak nia Reinu, maski liu realidade importante liu, hanesan família. Urjénsia atu komunika Evanjellu, ne’ebé harahun kadeia mate nian no inaugura moris rohan-laek, la admite atrazu, maibé rekere prontidaun no disponibilidade. Nune’e, Kreda itinerante, no iha-ne’e Kreda desiziva, atua lalais, iha momentu, hodi la hein.
Personajen datoluk hakarak mós tuir Jezús maibé ho kondisaun ida: sei halo depoizde despede parente sira. No nia rona Mestre dehan ba nia: «La iha ema ida ne’ebé kaer tiha xarua no hafoin hateke ba kotuk, nia la soi ba Maromak nia reinu» (v. 62). Tuir Jezús esklui arrependimentu no hateke ba kotuk, maibé husu virtude desizaun nian.
Kreda, atu tuir Jezús, Kreda ne’e itinerante, atua kedas, lalais no desiziva. Valór husi kondisaun sira ne’ebé Jezús estabelese – itineránsia, prontidaun no desizaun – la hetan iha liafuan sira kona-ba “lae” hasoru buat di’ak no importante sira moris nian. Nia subliña liu mak objetivu prinsipál: sai Kristu nia eskolante! Hilin ida livre no konxiente, halo tanba domin, atu retribui Maromak nia grasa folin liu, no la halo nu’udar modu ida atu promove an rasuk. Triste atu haree ida-ne’e! Susar ba ema sira ne’ebé hanoin katak tuir Jezús atu promove an rasik, katak atu halo karreira, atu sente nia an importante ka hetan fatin ida prestíjiu nian. Jezús hakarka ita apaixonadu ba Nia no ba Evanjellu. Paixaun ida fuan nian ne’ebé tradús iha prosimidade, besik ba maun-alin sira ne’ebé presiza liu atu simu sira no tau matan ba sira. Hanesan loloos nu’udar nia halo.
Virjen Maria, Kreda nia ilas ne’ebé iha dalan, tulun ita tuir Na’i Jezús iha ksolok no atu haklaken ba maun-alin sira, ho domin foun, Liafun-Di’ak salvasaun nian.
