Dili – Husi 5-6 Jullu 2019, ekónoma Lokál sira halibur hamutuk iha uma Provincial Comoro-Dili hodi halao Formasaun Trimestrál no serbisu administrasaun nian ba fulan neen.
Iha loron dahuluk enkontru nian, ekónoma Provinsiál Irmán Carmen Ramos Bravo, FMA fó benvinda no introdús kona-ba livru “Orientasaun Jestaun Komuñaun soin sira iha Institutu FMA”. Hotu tiha Irmán sira ida-idak, hakle’an pesoalmente kona-ba konteúdu sira iha livru ne’e nia laran, hafoin mak fahe iha grupu laran hodi hatán ba pergunta sira tuirmai ne’e: “Saida mak komuñaun soin sira? Saida mak atitude sira ne’ebé bele fó implikasaun ba ekónoma sira? Elementu saida de’it mak iha ekonomia Solidária nia laran? Saida mak diferensa entre komuñaun soin sira no ekonomia solidária?
Haree ba pergunta sira bele fó ideia ida kle’an husi Irmán ida-idak nia reflesaun kona-ba komuñaun soin sira, mak ita rekursu sira: materiál, espirituál no matenek sira ne’ebé ita ida-idak iha, bele tau hamutuk hodi serbí iha ita nia misaun. Buat ne’ebé implika no sai elementu importante mak, ita fó ho ksolok no fahe buat hotu ne’ebé iha ba ema ne’ebé presiza. Diferensa entre komuñaun soin sira no ekonomia solidária mak hahalok konkretu ne’ebé sai husi ita nia individualizmu ne’ebé hatene fahe riku soin ne’ebé ita iha.
Hotu tiha, kontinua kedas ho serbisu Plataforma Institutu nian ne’ebé liga ho ita-nia serbisu no misaun. Iha loron tuir mai mak serbisu budget ne’ebé komunidade ida-idak prepara hodi haree ba fulan neen nian.
Irmán sira hotu ho entuziasmu hala’o serbisu ho ksolok too remata, hafoin loron tuir mai mak ida-idak fila fila ho ksolok ba ida-idak nia komunidade.
(Ines Freitas)
