Venilale – Sorte boot mai ita nu’udar Família Saleziana bele konta ho membru sira nia solidariedade, iha tempu ne’ebé ita sente terus no lutu. FMA sira iha mundu lutu ba Madre Antonia Colombo, Madre Jerál FMA ba tinan 12, husi 1996-2008.
Solidariedade ne’e manifesta liuhusi selebrasaun eukarístika liutiha loron sanulu nia mate. Missa sufrájiu ida-ne’e atu husu Maromak, “hanesan ita-nia fiar dehan ba ninia salvasaun, ba nia moris rohan-laek ninian”, nu’udar Amu Júlio Mota dehan iha omilia.
Iha introdusaun, Ir Abelita lee Madre Antonia nia perfíl no ita bele hatene katak bainhira nia remata “liceo”, ninia aspirasaun mak “serví foin-sa’e kiak no ema kbiit-laek sira iha área direitu nian, hodi sai defensora ba sira-nia direitu”. Enkontru ho FMA sira iha Oratóriu no Superiora Provinsiál iha nia rain Lecco-Milano (Italia), sai determinante ba ninia hilin definitiva no radikál atu saran an ba Maromak iha vokasaun relijioza Saleziana. Iha tinan 1989, hili nia sai superiora provinsial iha Taranto. Tinan ida de’it iha Kapítuluj Jerál XIX, nia eleita ba Konselleira Vizitadora. Iha tinan 1993 nia akompaña Madre Jerál Marinella Castagna ne’ebé mai selebra festa agradesimentu iha nivel mundiál iha Wailili (Baucau), Timor Leste.
Eleita ba Superiora Jerál, nia gia Institutu FMA ho atensaun boot ba sinál sira tempu nian no ba Kreda Universál nia dokumentu sira no Amu-Papa sira-nia majistériu. Madre Antonia promove servisu animasaun ida ho modelu sirkulár atu valoriza ema ida-idak nia rekursu no nu’udar sasin komuñaun nian. Nia husu atu tau aas kultura moris no promosaun ba feto foin-sa’e sira nia dignidade. Iha ninia animasaun, Madre Antonia haburas kompromisu ba iha Sidadania ativu. Nia enkoraja komunidade edukativa sira atu sai ofisina moris no resiprosidade nian liuhusi relasaun edukativa sira. Nia fiar iha importánsia atu eduka ba valór solidariedade nian atu kontribui ba konvivénsia umana iha sinál sivilizasaun domin no dame nian ho abut iha Evanjellu.
Nune’e mak, Amu Júlio mós hateten katak, “ita hasae agradese ba buat di’ak hotu ne’ebé Na’i Maromak halo liuhusi Madre Antonia Colombo” tan, “Maromak laran luak no laran di’ak tebes” (salmu responsoriál nia refraun), ba Institutu FMA.
Husi Madre Jerál nia moris, ita bele aprende atu kaer metin nafatin ba Jezús atu husi ne’e ita la’o ba oin iha fidelidade. “Madre Antonia Colombo hatudu mai ita atu “moris iha vida relijioza iha fidelidade… to’o mate”, atu “sai fiél iha ita-nia knaar sira”.
Missa sufrájiu ba Madre Antonia Colombo prezide husi Padre José de Sá, Reitór Komunidade SDB no konselebra husi padre Abrão no Padre Júlio.
