Fatumaka – Grupu ADB (Amigos de Don Bosco) ka ami bolu “Bosconians”, husi ETV S. Maria Mazzarello (Venillale), halo atividade solidariedade iiha loron 26 Jullu, ba kolega Fidélia ne’ebé tinan ne’e deskansa husi ninia estudu tanba moras grave ida. Nia presiza ba doutór kardiólogu (fuan) nian fulan-fulan atu simu injesaun ba ninia moras. “Bosconians” ba vizita nia iha nia hela-fatin iha Fatumaka, ba oras ruma sira oferese knananuk-orasaun ida, dada-lia ho nia. Ir Jacinta Gusmão, Mestre Cipriano no biin Delima mak akompaña sira nain 35. Ir Jacinta Gusmão husu ba Fidélia kona-ba saida mak ninia mehi ba nia moris, depoizde hetan moras no Maromak haraik oportunidade atu moris nafatin ne’e. Fidélia hatán katak nia hakarak kontinua estuda tinan oin iha ETV (ba Segundo ano -técnico-alimentar). Maibé seidauk iha buat seluk ne’ebé nia hanoin ba ninia moris. Buat ne’ebé tulun nia ba oin mak ninia família nia domin no orasaun ba Na’i-Feto. Nune’e, grupu oferese ba nia rozáriu ida ho buat seluk tan ne’ebé sira halibur hamutuk.
Atividade ida-ne’e nu’udar grupu nia kompromisu atu moris “Christus Vivit” nia mensajen sira ne’ebé sira estuda durante tempu ne’e. Iha roteiru 4 foin-sa’e sira hakle’an kona-ba “Anúnsiu boot” Maromak nian ba foin-sa’e sira: “Iha kondisaun naran de’it sira hela bá, ohin ha’u hakarak haklaken ba foin-sa’e buat ne’ebé importante liu, buat ne’ebé ita nunka bele nonok de’it. Ne’e mak lia-menon ne’ebé iha lia-loos boot tolu ne’ebé ita hotu presiza rona nafatin” (Christus Vivit 111). “Lia-loos dahuluk ne’ebé ha’u haklaken ba imi ida-idak mak ne’e: “«Maromak hadomi»” (Christus Vivit 112). “Lia-loos boot daruak mak Kristu, tan domin, sakrifika nia An tomak atu salva ó.” (Christus Vivit 118). “Ikus mai, iha lia-loos datoluk, ne’ebé la bele haketak husi lia-loos daruak: Kristu moris!”. (Christus Vivit 124).
Nune’e, sira simu konvite atu halo asaun solidária ba foin-sa’e ho naran/oin konkretu ida ho nesesidade. Motivasaun ba prezensa solidária besik ba ema kiak mak sai sinál Maromak ne’ebé hadomi, Kristu ne’ebé moris no soi ita. Sira-nia foin-sa’e konkretu mak “Fidélia”.
Depoizde vizita ba Fidélia, sira kontinua ba vizita Santuáriu Maria Auxiliadora atu reza ba foin-sa’e sira, liuliu sira ne’ebé iha nakukun laran (moris iha seksu livre, soe/oho bebé), vizita ETP Fatumaka, no hafoin liu ba “Cascata” atu haree natureza nia furak. Iha oras 4 nia laran sira konsege hakmaan isin, neon no klamar, depoizde ezame períodu trimestre daruak.
