Enkontru ho FMA Perpetua Zona Dili
Dili – Ohin, loron 8 Agostu 2019, iha Komoro – Dili, Madre Maria Nieves Riboso, Konsilleira Jeral ba ambito Formasaun, halo enkontru ho Irman Perpetua sira. Enkontru hahu orasaun abertura, tuir mai hanesan mos ho grupo sira seluk, Me. Nieves fo pergunta balun ba Irman sira atu hatan. Pergunta sira ne’e tulun tebes Irman sira atu hare fali ba esperiensia dalan formasaun nian ne’ebe sira halao ona no esperiensia naroman no nakukun nian ne’ebe ida-idak liu ona. Hafoin Madre fahe kona ba Moris iha formasaun permanente: hun haburas nian paisaun no ksolok iha identidade FMA.
Tempu ne’ebe ita moris ba mak ita nian, buat ne’ebe ohin fo mai ita atu moris nakonu ho dezafiu no promesa sira, tempu agradesimento nian ba vokasaun ne’ebe ita simu atu akompana foin sae sira. Maromak hanorin ita atu akompana foin sae sira atu sira bele hetan ksolok. Tan ne’e ho enkontro ida ne’e tulun liu tan Irman atu moris ho ksolok no konxiente nafatin katak formasaun permanente mak disponibilidade ida ne’ebe konstante atu aprende husi moris, husi situasaun oi-oin no relasaun umana ne’ebe esprime iha iha mris lor-loron nian; liu husi moris espiritual, moris komunidade no moris apostoladu nian. Nomos Formasaun permanente mak liberdade intelijente no badinas nian hodi husik an atu moris mak forma ita nia moris tomak.
Iha reflesaun barak ne’ebe nu’dar naroman ba Irman sira nia dalan formasaun nian. Lia fuan “Docibiltas” wainhira le’e dokumentu sira kreda nian no Institutu nian ita sei la hetan maibe nia komprensaun relevante tebes iha dokumentu sira ne’e nia laran. Docibilitas mak hahalok ida interior nian husi aspetu karateristiku barak, iha ne’ebe nein ida presente ho modun espontanea ka moris kedas iha ema. Laiha ema ida ne’ebe moris mai docibilis. Docibilitas nu’udar matenek espirito nian. Pessoa docibilis mak individu ne’ebe “aprende ona atu aprende”, no ho ida ne’e sei kontinua nia formasaun loro-loron iha ninia ezistensia, iha ambiente naran deit no to’o loron ikus ninia moris nian no ho ema naran deit.
Keta tauk basa’a moris bele remata. Maibe tauk ba, se nunka mais hahu” (Newman) iha parte formasaun nian fali: “O atensaun ba perigu ne’ebe o nia formasaun nunka mais hahu”.Nune’e presiza loro-loron forma-an nafatin no laran metin laiha limite, ba sira ne’ebe hatene katak Aman Maromak preokupa sira nia formasaun no hein sira iha ne’eba, iha loron ida-idak, no iha ne’ebe deit, nia sei lori ba oin ninia projetu formativo, iha ambiente oi-oin no frakeza sira. Certeza katak Maromak Nia planu liu mos iha Santu sira no maksalak sira, ema importante sira no ema simples sira, matenek sira no beik sira, iha fatin bai-bain sira ka koleju sira ka periferia sira.
Obrigada barak Me. Maria Nieves Reboso, ba formasaun ne’ebe ita fahe ona ba Irman sira klean tebes no tulun tebes sira iha dalan formasaun nian ida ne’e. Maria Auxilidora sei akompana nafatin FMA sira hotu atu halo ida-idak nia dalan formasaun nian hamutuk iha moris loro-loron ba Santidade. OBRIGADA BARAK.
Ir. Noemia de Deus
