“Tinan 25 Escola Técnico-Vocacional S. Maria Mazzarello”
Venilale – Durante loron rua, Escola Técnico-Vocacional Hotelaria e Turismo S. Maria Mazzarello selebra aniversáriu tinan 25 nian. Loron dahuluk prienxe ho benvinda, palestra no fahe esperiénsia, konvíviu. Loron daruak iha bensaun ba portaun ETV nian ne’ebé Antiga/u aluna/u sira mak hadi’ak, Santa Missa, omenajen no premiasaun no almosu.
Festa nia tema mak “Husi jerasaun ba jerasaun, agradese nafatin”, basá Maromak hala’o kmanek oioin iha ema hotu ne’ebé liu husi “Eskola” no “uma” ida-ne’e.
Aprezentasaun “Istória Fini nian” husi estudante sira, hatudu katak, fini ne’ebé kuda iha tinan 1994 fó ona fuan ho antiga/u aluna/u 877 no se Maromak hakarak, iha 2019 sei remata kursu estudante 70.
Ir Alma Castagna,Provinsiál FMA TIN iha ninia diskursu, loron 31, kaer pasajen evanjélika rua: “Imi mak mundu nia naroman” no “sidade ne’ebé hari’i iha foho leten labele subar an” atu fó hanoin kona-ba eskola ne’e nia perfíl: sai “Roman”.
Uluknanai “Sai roman iha aspetu edukativu”. Ir Alma hateten katak, estudante sira ne’ebé liu iha ne’e la’ós katak santu, karik iha balun kuaze santa/u, maibé barak liu mak “mutu-rabu”. Ne’e atu hateten katak “Don Bosco no Madre Mazzarello nia Sistema di’ak ba hotu: di’ak ba sira di’ak, di’ak ba sira ne’ebé atrapalla uitoan”. Eskola ne’e, tuir Ir Alma sai mós “roman iha aspetu profisionál”. Ir Paola Battagliola mak hanoin, luta atu obra ne’e iha atu foin-sa’e feto no ikusmai mane sira bele sai ema profisionál, hodi buka atu fó buat ne’ebé di’ak liu. “Kurrikulu loos uluk nian mak primeiro ano aihan lokál, Segundo ano aihan aziátika, terceiro ano aihan kontinentál. Madre Paola dehan, la buat ida, ita hahú ho aihan kontinentál”, ne’ebé nia rasik halo.
Datoluk, “roman iha aspetu sarani”. Irmán no profesór/a sira haka’as an atu “kria ambiente iha-ne’ebé aluna/u sira bele hasoru Maromak, bele kria amizade ho Jezús no haboot, eh pelumenus buka sira-nia vokasaun, dezenvolve talentu…”.
Ikusnian, “roman iha aspetu sosiál”. Eskola ne’e “esforsu atu sente territóriu nia problema, atu investe rekursu sira iha territóriu, iha Venilale”, esforsu atu “bele moris tuir valór sira”, Ir Alma salienta. Sira ne’ebé iha ne’e iha tinan 2006-2008, bele hanoin katak “maski ema koko atu haketak loro-monu husi loro-sa’e, iha-ne’e hotu-hotu moris hakmatek hamutuk; maski fatuk monu husi sorin, husi sorin maibé iha-ne’e hakmatek de’it no nafatin hetan ema iha Venilale ne’ebé suporta ami”.
Nu’udar eskola tékniku-vokasionál, hanesan señór Amandio husi INDMO ne’ebé marka prezensa iha festa hateten, eskola presiza nafatin haburas ninia kualidade atu prepara rekursu umanu ne’ebé sai ema no sarani di’ak, sai ajente dezenvolvimentu nian, no bele hatán ba demanda sira seitór oteleira no turizmu nian.
Haree ba istória”ETV” nian, ita husi eskola ba feminina ba eskola mista, husi área estudu ne’ebé oferese iha inísiu no iha tempu tuirmai, hatudu katak, ETV hakarak hatán ba dezafiu sira istória aprezenta.
Iha Missa Agradesimentu, furak liu atu haree jestu entrega fini husi profesora Isabel no profesora Eufrásia ne’ebé selebra mós tinan 25 nu’udar dosente, entrega fini edukasaun nakonu ho valór umanu no sarani nian ba kada grupu finalista nian to’o ikus lori fini ne’e tau iha Altár, katak entrega ba Maromak. Padre Apolinário SDB, Provinsiál SDB Timor-Leste nian salienta jestu ida-ne’e iha ninia omilia, atu ita hatutan buat ne’ebé simu ona ba sosiedade, ba família. “Don Bosco no Madre Mazzarello kontente tebes ba kreximentu vokasaun sarani nian, vokasaun relijioza iha fini ne’e”.
Selebrasaun ne’e organiza husi ETV no Antiga/u aluna/u nia estrutura nasionál. Sira liu atus ida resin mai selebra hodi hasoru malu no haksolok bele fahe esperiénsia, kona-ba buat ne’ebe sira aprende iha-ne’e no sira nia susesu iha moris, ho modu partikulár Alzira dos Reis (eis diretora Alola Foundation). Asosiasaun Antiga/u aluna/u FMA sira fó prezente hodi hadi’ak portaun rua ETV nian no muru eskola oin no kontribuisaun ruma ba hahán. Estudante no korpu dosente fó kontribuisaun finanseiru ($1,000) no konserteza, sai “host” ba festa ida-ne’e iha sub-komisaun oioin.
Foti fali Provinsiál FMA nia liafuan, ami hato’o “agradesimentu boot ba ema hotu iha laran no iha li’ur baki, maibé suporta obra, hahalok no prezensa iha-ne’e”.
