S. JOSÉ NO VOKASAUN
Iha planu salvasaun, S. José, soi ninia fatin ida, katak vokasaun ida. La iha ema ida mak la tama iha Maromak ninia planu, ita hotu simu bolun husi Maromak. Ita tenke fiar kona-ba lia-loos fundamentál ida-ne’e atu bele interpreta ita-nia moris. Simu bolun husi Maromak katak Maromak tau ita iha ninia planu salvasaun atu sai benefisiáriu no kolaboradór. Maromak la salva de’it ita, maibé bolu mós ita atu ita mós sai salvadór sira.
Ema sira husu sentidu moris nian. Ne’e tanba la iha pergunta ida esensiál no fundamentál liu duké ida-ne’e. La presiza haluha katak ema mak realidade ida ne’ebé la bele desifra bainhira nia haketak an husi Maromak no hanoin nia la tama iha planu salvasaun nian. S. José mak ezemplu ida kona-ba oinsá kriatura ida tenke hatán ba Maromak nia planu ba ninia an rasik.. Husi Maromak nia insiativa nia tama iha mistériu Inkarnasaun Liafuan nian ho kompromisu boot: nia mak Maria nia kaben, Jezús nia aman hakiak no lori ba oin Inkarnasaun nu’udar eventu istóriku ida, nu’udar faktu umanu no sosietáriu . Nia mak prezide família Nazaré nian, sustenta ho ninia serbisu, defende no proteje nia, hodi la halo an nu’udar protagonista, maibé fó ba Maromak. Ita dalaruma iha falta intemperansa nian no ita halo fali an nu’udar konkorrente Maromak nian, hodi haluha katak ema nia dignidade konsiste iha ninia an nu’udar Maromak nia kriatura, bolu ba Ninia servisu. S. José komprende didi’ak buat ne’e, tanba nia komprende saida mak esensiál: katak Maromak sempre dehan sin no dehan iha haraik-an no dehan iha obediénsia. Ho modu ne’e nia realiza an nu’idar ema mós no ita baree nia iha istória umana salvasaun nian ho ninia sim nakonu iha fiar no abandona an. Ita tenke aprende husi S. José liuliu atu konverte an, katak saiba beibeik “Maromak nia ema kiak sira”, kriatura simples, oan ki’i-oan sira Aman nian, ho serteza ida iha fuan ne’ebé hanaran fiar, ho Liberdade klamar nian ne’ebé hanaran esperansa filiál. Fiar no esperansa ne’ebé sai José nia substánsia profunda domin no servisu nian.
S. JOSÉ NIA DOSILIDADE
Ita hateke oinsá santu Patriarka ida-ne’e, ikus husi Testamentu Tuan no dahuluk iha Testamentu Foun, interpreta ninia moris. Moris mak buat ne’ebé iha no ema interpreta liuhusi ideolojia oioin nopropoin sira nia evanjellu. Ita iha de’it Evanjellu ida, ida Na’i Jezús Kristu nian, mai husi Aman atu lori ita ba Aman. Maibé presiza husik Nia lori ita, presiza moris kontinuamente esperiénsia ézodu nian, hosi haluha sasán sira rai nian atu bá Maromak. S. José husik atu Na’i lori nia iha dalan sira nia la koñese, misteriozu. Nia la buka komprende maibé aseita atu fiar; nia lakohi possui atu husik Maromak possui nia; nia lakohi komanda no aseita atu obedese. NIa mak kriatura ida ne’ebé ita bele define “lahó pretensaun”. Nia husik Na’i gia nia no ida halo nia tama ho modu íntimu iha mistériu Inkarnasaun no salvasaun nian. Hodi husik Na’i lori nia, S. José sai kontemplativu iha Kristu nia Inkarnasaun. Nia kontempla iha virjindade ne’ebé nakonu ho maravilla, la foer no fekunda ninia Espoza nian; nia haree sai buras aihun ne’ebé lakan Espíritu nia fuan benditu, Jezús Salvadór, besik liu no tama iha Maromak nia mistériu halo an ba ema. Nia tama maibé atu saran ba ema seluk. Nia hanesan lalatak ida ne’ebé iha bainhira sei presiza, hafoin nia bá iha Maromak nia liman.
