Dili – Iha loron 3, Abril 2020, Irmán sira komunidade zona Dili nia halo despedida ba María Carmen Ramos Bravo ne’ebé loron tuir mai, katak 4 Abril sei fila fali ba nia rai España. Nu’udar família agradese ba Maromak ba prezensa Ir. Carmen nian iha Inspetoria TIN nu’udar Misionária no iha tinan tolu nia laran kaer knaar nu’udar Ekónoma Provinsiál. Don Bosco hameno ba nia oan feto sira : “Loroloron agradese nafatin ba Maria”. Hamutuk ho Ir. Carmen, ita agradese ba Maromak ba grasa vokasaun missionario nian. Liafuan “ missionáriu” katak haruka ba haklaken. Jezús mak missionáriu uluk, ne’ebé Aman Maromak haruka mai atu salva ita no sai instrumentu Divino iha mundu. Jezús mak modelu serbi, domin no ksolok nian ne’ebé los, hanesan Jezús dehan” Ha’u mai atu serví, la’ós ema atu serbi Ha’u “. Atu sai ema ba ema seluk katak dedika-an totál, serví ho haraik-an no domin. Tanba Na’i Maromak mak domin, ukun fuan Ninia mak: “ Ita hadomi malu nu’udar Nia hadomi ita”. Ita halibur hamutuk tan Nai nia domin. Maromak mak ksolok nia hun, bee-atan Ksolok lolos nian mak Jezús nia moris hias. Maromak halo ita moris hamutuk atu moris iha Ninia ksolok. Ksolok Na’i Maromak nian mai ita mak grasa loroloron ne’ebé ita simu. Laran metin mak virtude konfiansa nian. Orasaun sei hametin liután ita nia laran metin, no halo buras ita ema nia fiar hodi tau an tomak iha Na’i. Ema ne’ebé hein moris ho ksolok, Maromak horik ho nia.
Ho domin ami agradese ba Ir. Carmen ne’ebé banati tuir Jezús nia ain fatin, hodi saran-an ba Na’i nia misaun, iha Institutu liuliu Ita nia Inspetoria TIN. Ba laran manas missionária nian, ba espíritu sakrifísiu ne’ebé la sura kolen, ba domin ne’ebé fo no la hein atu simu fali, ba espíritu animasaun nian iha komunudade no iha misaun, ba sasin orasaun nian no sasin laran metin iha Maromak nia providénsia, dedika-an tomak, sakrifísiu no ksolok hodi serbi foin-sa’e sira, ba disponibilidade no laran-luak atu tulun iha Komunidade sira hodi la sura kolen no ba moris fraterna ne’ebé partilla ona ho ema ida-idak durante ne’e.
Ho okaziaun espesiál ne’e Ir. Carmen dehan: “Ha’u agradese barak ba ema ne’ebé servisu hamutuk ho ha’u momentu períodu tolu iha ne’e, iha inspetoria, momentu badak ka tempo badak. Ha’u agradese ba loke odamatan mai ha’u atu tama no agora ha’u atu sai. Ha’u uza lia fuan tolu: agradese ba orasaun, ba imi ida-idak nia orasaun, husu deskulpa, no lisensa atu ho mala sai. Husu imi nia orasaun atu aban dadeer ha’u bele to Portugal no Portugal bele simu tanba loroloron nafatin iha buat ruma ne’ebé ita la hatene. Ha’u bá tanba ba Papá no Mamá ne’ebé Maromak hakarak ha’u hamutuk ho sira. Husu orasaun ba ha’u nia família. Obrigada ba Inspetoria no ba Institutu, ha’u la hatene kona-ba futuru, momentu ida ne’e komplikadu uituan nune’e ita koalia de’it kona-ba prezente no iha ne’e. DB no MM marka prezente forte iha Timor sei tulun atu kontinua nafatin karizma”.
Ir María Carmen Ramos Bravo to’o iha Timor-Leste iha 6 Setembru 2013.
Obrigada, Gracias, Thank you, Grazie Ir. Carmen. Maromak akompaña ita nia viajen no haraik bensaun ba Madre no família. Ita reza ba malu. Obrigada barak.
(Noemia de Deus)
