Venilale – Iha 25 Novembru, komunidade Edukativa Madre Mazzarello Venilale selebra festa Gratidaun nian ho tema; “AGRADESE NA’I BA NIA DI’AK NO DOMIN ROHAN LAEK”.
Preparasaun ba festa gratidaun ne’e hahu iha loron 16-25; hodi reza ba grupu idaidak ne’ebé eziste iha komunidade ida ne’e: Estudante I no II Ano, Kolaborador/a , mestre/a, Benfetór sira, Aman – Inan, Oratorianu, estudante finalista 2020, Irmán sira komunidade nian no ikus liu mak ba diretora komunidade nian; Ir. Jacinta Maria Gusmão FMA. Objetivu husi festa gratidaun ne’e, nu’udar tradisaun Salesiana ne’ebé Don Bosco no Madre Mazzarello husik hela. Tan ne’e to’o ohin loron komunidade sira kontinua selebra attitude gratidaun ida ne’e, atu agradese Maromak no ba maluk sira buat di’ak hotu ne’ebé simu durante tinan ida nia laran.
Momentu iha Eukaristia
Nune’e ohin, membru komunidade edukativa, kolaboradór/a, estudante I no II ano , estudante finalista sira, mai halibur hamutuk iha komunidade Madre Mazzarello, hodi selebra festa gratidaun/ agradesimentu hamutuk. Festa ida ne’e hahu ho Santa Misa, ne’ebé Padre Abrão Soares Pinto,SDB mak selebra. Iha homilia Amu selebrante fó pergunta rua (2) ;
Tansa ita tenke fó agradese? no agradese ba Se?
Hafoin Amu selebrante fó resposta dahuluk nian katak; Ita agradese Maromak, tan ida ne’e mak Maromak nia hakarak, hanesan Salmu 118;1, hateten: “Agradese Maromak basá Nia di’ak, Nia domin rohan laek”. Agradesimentu ne’e sai kostume ba ita iha fatin ne’ebé deit, no nu’udar Kristaun, ida ne’e mak ita nia aimoruk atu lori ita hetan salvasaun no ksolok. Iha pontu daruak; ita nia resposta lolós mak iha Eukaristia Santa, ne’ebé Na’I Jezús Kristu hatudu iha Nia misaun, bainhira halo Nia misaun hotu Nia reza ne’e mak orasaun AMI AMAN ne’ebé husik hela mai ita. Pontu datoluk ami selebrante fó lia menon ba finalista sira atu labele haluha buat di’ak hotu maske kiik, husi irmán sira, mestre/a sira no ema hotu ne’ebé halo ba imi. Tan ida ne’e mak Na’I Jezús hanorin mai ita, nune’e deit mak it abele valoriza buat diak husi Maromak. Tan Maromak fó buat hotu diak mai ita, ita mós oferese buat diak ba Maromak.
Momentu konfraternizasaun no Agradesimentu nian
Hafoin, est
udante no komunidade Edukativa sira halibur hamutuk iha Refetóriu Koléjiu nian, kontinua programa konfraternizasaun no agradesimentu nian, ne’ebé finalista sira mak prepara. Iha momentu ne’e grupu ida-idak hahu husi; Padre kapelaun, irmán sira, professor sira, no estudante sira hato’o no espresa sira nia sentidu agradesimentu nian liu husi knananuk no liafuan. Ba irmán sira ne’ebé hetan misaun foun iha komunidade foun no ba finalista sira ne’ebé remata ona sira nia estudu iha koléjiu ida ne’e.
Liafuan agradesimentu husi profesores sira ba Irmán sira.
Obrigada ba madre nia dedikasaun hodi taumatan ba ami-nia formasaun. Formasaun hirak ne’e, aumenta ami-nia koñesimentu no kapasidade hodi hanorin. Ami mós agradese ba madre tan formasaun sira ne’e tulun ami atu hadomi liután karizma saleziana.
Husi estudante finalista
Agradese ba mestre/a sira, ba domin, dedikasaun no matenek ne’ebé fahe ona ba ami. Uluk ami mai ho mamuk, ohin, ami nia kohe nakonu no sufisiente ona. Nu’udar ema husu deskulpa tan hahalok balun ne’ebé la monu ba mestre/a sira nia laran.
Iha momentu hanesan irmán diretora eskola nian; Ir. Fabiola Simoes, FMA husu mos ba finalista sira atu implementa tau iha pratika valores moral no fiar nian ne’ebé simu iha eskola ida ne’e, iha sosiedade, familia no fatin hotu ne’ebé imi ba.
Hafoin irmán diretora komunidade nian fó lia menon bazeia ba liafuna chave 3 husi Papa Francisco nian.” Obrigada”. tan ita remata eskola no hotu- hotu sai finalista. “Deskulpa” ; Se durante iha prosesu aprendizajen ha’u haka’as imi no tuir imi, bainhira valor la dun di’ak, maibé ida ne’e hotu hakarak dezenvolve imi nia kakutak. Lisensa. Ha’u lisensa tanba ha’u tenke ba. Hafoin Irmán diretora hameno ba finalista sira atu keta tauk hakbesik ba madre sira no keta tauk ba komunidade seluk madre sira nian, tanba imi antigu/a aluno ne’e uma hotu imi nian uman.
(Alice Filipe FMA)
