Fuiloro, 01 Dezembru, Komunidade Beata Maddalena Morano Fuiloro dedika loron ne’e nu’udar loron agradesimentu ba Komunidade. Agradese Maromak ba moris hamutuk iha komunidade ida nu’udar bin alin e familia ida tanba Kristu ne’ebe bolu ita ida-idak atu hala’o Ninia Misaun Salvasun nian ba Foinsae sira ne’ebe hela hamutuk ho ami, hamutuk 114, (Menina EScola Agricola, Menina Kursus Computer e Suku) Kolaboradores ne’ebe ajuda mai nia misaun, Nai Lulik Saleziano sira husi Fuiloro & Lospalos ne’ebe tulun ami iha vida espiritual liu-liu: iha Sakramentu Eukaristia lor-loron no mos Sakramento Konfesa kada fulan. Ohin loron ne’e Agradese ba ema hotu nia diak durante tinan ida nia laran.
Agradesimentu ne’e hahu ho Eukaristia Santa iha dadersan oras tuku 06:00, preside Eukaristia ne’e husi Padre Antonio Transfiguração Pinto, SDB. Tempu hanesan Menina Kolejiu ida husi Escola Técnica Agricola (ETA Fuiloro) simu mos Jesus nia Futar Isin ba dala uluk iha Kapela Komunidade Beata Maddalena Morano Fuiloro. Maski iha klima ezame nia laran, maibe nia fuan pronto e hakarak Simu Jesus.
Iha omilia Padre Transfiguração hato’o sentidu husi festa agradesimentu ne’e iha pontu 3 :
- Agradesimentu ne’e dehan katak rekoñese ema seluk nia favor ne’ebe halo mai ita, maski liafuan mamuk deit maibe importante mak agradese nafatin
- Sinal apresiasaun ba buat ne’ebe ema fó, halo no koalia, nia sente nia an nia iha valor.
- Ema ne’ebe hatene agradese ne’e tuir psikolojia ne’e hatudu katak ema nee nia memoria diak no sente katak nia fó e nia sei simu tan, ema ne’ebe hatene agradese sei simu barak.
Iha tempu kalan nian, Komunidade fahe ksolok hamutuk ho Irmã sira, Saleziano sira husi Fuiloro, Kolaboradores sira hodi agradese malu liu husi hananu agradese nian husi Menina Kolejiu sira no ikus taka liafuan badak nu’udar Boa noite husi Madre Ermelinda Gomes, FMA nudar Diretora uma nian hodi dehan: Agradese ba malu ne’e hahu kedas iha tempu Don Bosco nian. Iha tinan ida nia laran ita agradese ba buat diak hotu ne’ebe ita simu, liu-liu fahe domin fratenidade ksolok no moris hamutuk nudar bin alin iha komunidade nia laran.
(Ines Bartolo FMA)
