Santa Escolástica mak Saun Bento nia feton, hahú iha sékulu V, mosteiru femininu dahuluk iha osidente, ne’ebé harii iha fundamentu vida komún nian, konseitu ne’ebé introduz iha vida monje sira nian. Saun Bento mak dahuluk orienta an atu serví Na’i la’ós hodi “halai husi mundu” liuhusi solidaun ka iha peniténsia itinerante, hanesan monje sira oriente nian, maibé moris iha komunidade ne’ebé metin no organizada, fahe ho modu rigorozu tempu entre orasaun, serbisu/estudu no deskansa.
Santa Escolástica no Saun Bento mak maun-alin kaduak, moris iha Nórcia, rejiaun sentrál Itália nian iha tinan 480. Moris husi família nobre, sira-nia aman hela nu’udar faluk bainhira sira moris, tan ninia espoza mate bainhira partu. Santa Escolástica, feto orasaun nian, sei foin-sa’e kedas Escolástica konsagra an ba Na’i hodi halo votu kastidade, banhira nia maun sei estuda kona-ba retórika iha Roma. Bainhira aman mate, sira fahe rikusoin ba kiak sira hodi tuir Kristu. La kleur Bento funda mosteiru iha Monte Cassino harii Orden monje Beneditinu nian. Nune’e Escolástica hetan inspirasaun husi nia maun Bento, funda mós mosteiru ba Irmán sira, ho grupu ki’ik, grupu foin-sa’e konsagrada. Husi ne’e, hahú Orden Beneditina, ne’ebé simu naran ne’e atu fó omenajen ba ninia maun, ne’ebé fó inspirasaun no ida ne’ebé elabora Regra sira komunidade nian.
Maski moris iha mosteiru ne’ebé besik malu, maibé maun-alin na’in rua ne’e hasoru malu tinan ida dala ida, atu mantein nafatin espíritu mortifikasaun no tane aas esperiénsia espirituál, hodi fahe ba malu kona-ba moris espirituál no kona-ba atividade Igreja nian.
Saun Gregório haktuir istória furak kona-ba sira-nia enkontru ikus. Santu na’in rua pasa sira-nia tempu hamutuk hodi konforta malu ho “diskursu lalehan nian” no bainhira kalan besik daudaun, Bento prepara an atu bá ona. Escolástica ne’eb’e hanoin katak ne’e sira-nia oportunidade ikus atu hasoru malu, nia husu Bento atu pasa kalan hodi kontinua dada-lia. Bento ho forsalakohi tanba nia lakohi kontra ninia regra hodi pasa kalan la’ós iha ninia konventu iha Monte Cassino. Escolástica tanis, tau nia ulun iha meza leten, no husu ba Maromak iha ninia laran-susar, harohan atu Nia intervein no husik nia naan ho nia. Hodi halo nune’e, derepente udan maka’as tun. Mosu iha lalehan rai-lakan, no rai tarutu, no udan no udan-fatuk tun maka’as nune’e, halo Bento ho nia maluk sira labele sai no bá sira-nia konventu.
“Maromak Leten Aas perdua ó, feton,” Bento dehan, “ba buat ne’ebé ó halo”. “Ha’u husu favór ba ó,”, Escolástica hatán, “no ó rejeita”. Ha’u husu ba Maromak no Nia haraik! Sira partilla dada-lia espirituál furak, íntima iha kalan tomak.
Bainhira to’o iha Monte Cassino, Bento haree vizaun Escolástica nia klamar sai husi ni isin, sa’e ba lalehan ho forma manu-falur nian. Nia mate loron tolu liutiha sira-nia enkontru ikus, iha 10 Fevereiru tinan 547. Liutiha loron 40 Saun Bento bá tuir.
Escolástica mak monja dahuluk beneditina no santa. Santa ida ne’e hanorin ita atu persevera nafain iha vida orasaun no buka ema ne’ebé prudente no bele tau konfiansa atu fahe ita-nia moris espirituál.
Patrona: Hasoru udan no tempestade sira; labarik konvulsaun; monja sira; tempestade sira.
