Venilale – Iha 13 Maiu, ami komunidade Madre Mazzarello Venilale selebra festa padroeira komunidade nian, Santa Maria Domenica Mazzarello, ho fuan ksolok no festa nian hahú husi dadersaan to’o loraik. Festa ida ne’e hahú kedas iha loron 9 loron moris Main nian ba dala 184. Iha loron ne’e asosiasaun Madre Mazzarello mak organiza hodi selebra loron ne’e dansa no knananuk sira ba Madre Mazzarello no prepara fatin/ parajen hafoin esplika ba irman sira no menina interna sira ne’ebé ba vizita fatin sira ne’ebé Main ho nia família sira esperíensia susar no ksolok nian iha Mornese. Nune’e mós fatin sira ne’ebé Madre Mazzarello ho irmán dahuluk sira iha Mornese nian esperiénsia. Iha loron 12 loraik, ami selebra festa ida ne’e ho vesperas hamutuk.
Iha loron 13 oras 17:00 selebra Eukaristia santa iha parokia hamutuk ho família Salesiana Venilale nian. Eukaristia santa selebra husi Padre Abrão Pinto,SDB no ho koselebrante nain rua; Diretór komunidade nian, Padre José Ximenes SDB no Padre Pároku Padre Carlos Fernandes SDB. Iha omilia amu selebrante hateten ba ema hotu ne’ebe prezente katak; Santa Domingas Mazzarello mak santa ida simples no haraik-an maibé Maromak hili nia atu kolabora ho Maromak hodi halo projetu salvasaun nian liuliu ba foinsae feto sira ne’ebé “ 
susar” ema la tau matan maske sira iha família, liuliu sira ne’ebé kiak iha espiritual no moral. Madre Mazzarello konsege halo ida ne’e tan nia kolabora ho Maromak, nia serbisu ho Maromak no tan nia laran metin iha Maromak nia providensia no Maromak nia kbiit. Madre Mazzarello husik hela projetu ida ne’ebé sedauk remata. Madre Mazzarello husik hela misaun ida ne’e ba nia oan feto sira no mós ba Família Salesiana tomak atu kontinua projetu ida ne’e. Ida ne’e mak osan mean ne’ebé Madre Mazzarello husik hela.
Hafoin iha kalan, interna sira aprezenta drama Madre Mazzarello nia moris, hahú nia sei kiik, hola parte iha grupu Filhas de Maria Imaculada, hasoru malu ho Don Bosco, sai Filhas de Maria Ausiliadora, espedisaun irmán misionaria sira no ikus liu Madre Mazzarello fila fali ba Aman Maromak nia uman iha loron 14 Maiu 1881. Objetivu husi drama ne’e, mak atu interna sira bele koñese Madre Mazzarello nia virtude no nia moris ne’ebé hamutuk ho Don Bosco sai Ko – Fundadora ba Institutu Filhas de Maria Ausiliadora, no ba irmán sira sai momentu ida hafoun moris relijioza nu’udar Filhas de Maria Ausiliadora no sai laran manas liután iha misaun ho foinsa’e sira hanesan irmán sira dahuluk Mornese nian. Iha buona notte, Ir. Carolina le mensajen Madre Jerál nian ba komunidade tomak.
(Alice Filipe FMA)
