Ho ksolok ohin 5 Juñu, ita selebra moris ne’ebé saran an total ba Na’i iha santu ida ne’e, ne’ebé hanaran “Apóstolu Alemaña nian”. Moris iha Inglaterra iha tinan 673, iha rejiaun Devonshire ho naran batizmu Winfrid. Mai husi família nobre Ingleses. Sei ki’ik kedas nia família lori nia ba mosteiru Beneditinu sira nian atu bele hetan edukasaun di’ak iha akadémiku no mós iha relijioza. Ho nia adaptasaun ne’ebé di’ak iha ambiente ida-ne’e mak mosu vokasaun atu sai relijiozu no ho laran manas hakarak lori Jezús Kristu nia naran ba fatin sira ne’ebé do’ok.
Ho tinan 19 halo nia votus relijiozu iha abadia beneditina Exeter-Inglaterra. Hafoin sai professór mós iha fatin ne’e no iha ne’e nia deskobre ninia vokasaun misionária. Iha tinan 719 nia ba Alemaña atu haklaken Evanjellu. Iha okaziaun ida-ne’e mak Papa Gregório II, husu nia atu asume fali naran Bonifácio hodi fó omenajen ba S. Bonifácio santu mártir Romanu. Iha ne’ebá nia hetan rezultadu di’ak, konsege manán ema sira nia fuan hodi kuda fiar Kristaun iha territóriu Alemaña tomak.
Hafoin hili nia sai Bispu ba Igreja Mogúncia, no ajuda husi nia kolaboradór sira, nia harii no hadia fali Igreja barak iha Baviera, Turíngia no iha Francónia; nia mós konvoka konsíliu sira no promulga lei sira. Nia halo misaun to’o iha Fransa. Iha tinan 754 ba haklaken iha rai Olanda iha ne’ebé ninia apostoladu fó fuan barak hodi lori ema barak koñese Kristu. Iha Juñu, iha loron Pentekoste, selebra krisma ba grupu boot katekúmenu sira iha sidade Dokkun – Olanda. Foin hahú misa, grupu jentiu sira husi Frísia ataka igreja hodi oho hotu ema sira iha igreja laran. Sira tesi bispu Bonifacio nia ulun ho espada no nia saran nia klamar ba Na’i.
